› 選擇地區
三藩市
紐約
洛杉磯
其他美國地區
香港 台灣 北美
 
2015年02月03日

智取大市:港股變貨幣戰避風塘 - 晉佳

環球股市近期走勢非常之咁難捉,原因係一月差唔多個個星期有國家加入打貨幣戰,呢種環境,就算係七十後都未見過,見識過嘅投資者相信都去到退休年紀,呢啲幾十年先出現一次嘅事件,講求穩陣嘅老人家梗係靠邊站,後生一輩見到咁樣,亦難怪驚驚青青,令港股投資意欲低迷。
正常情況下滙率波動大都不利貿易同投資環境,股市應該偏弱。不過,喺歐元區量寬之下全球夠晒水頭,冇突發事件令信貸緊縮,呢一轉環球股市唔似即將大跌。
另一樣大家驚就係通縮,但通縮有幾驚,就好睇地區性。如果某個地區需求下跌令物價向下,然後出現通縮,會令經濟呈現惡性循環而下滑,呢個正正係歐元區嘅憂慮。問題係,對於香港嚟講,所謂貨幣戰同通縮會有幾大影響?事實上,貨幣大幅貶值嘅地區對香港投資、貿易比例都好低,直接影響輕微。
根據政府統計處數字,唔計BVI公司(估計都係強國人佔大部份),二○一三年內地喺香港直接投資頭寸佔整體金額48%,強國人持貨能力高強,呢批人唔會因為港元滙率偏強、人民幣滙價略為走弱而大舉撤資。

學超人買穩健型資產

香港貨品主要供應地,大約五成來自內地,至於進行量寬、調整滙率限制同減息嘅日本、新加坡、瑞士同印度,加埋比例15%左右,影響有限。香港轉口同本土產品出口目的地,分別53%同43%係送番去內地。只要人民幣唔大跌,加上港元同美元掛鈎,香港理應係貨幣戰之中嘅避風塘,外資錢多兼睇到呢一點,亦可能增加港股比重。事實係咪咁?睇吓港股短期內能唔能夠強勢突破25000點就知。
點樣會令香港喺貨幣戰之中失去優勢?除非人民幣滙價失控大跌吧,但以人民幣實力加上貨幣流通性偏低嚟講,至少比歐元波動性低得多。至於上半年喺咁嘅環境之下,可以買乜,第一,學超人買穩健型資產,誠哥可以買英國鐵路車輛租賃公司同電訊公司做玩具,近期芬佬亦衝入恒安國際(1044),長實(001)路數相若。
第二,本地概念股,原因係人民幣滙價貶值,人行仲邊有心情減息同減存款準備金率?人行無辦法開大水喉,註定中資股上半年好難強勢,資金換馬去股價相對每股資產淨值折讓嘅本地地產股,正常不過,其中可留意恒地(012)、信置(083),現價買先博升一至兩成。

晉佳
http://www.facebook.com/pages/ 晉佳/719009541518415
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載