› 選擇地區
三藩市
紐約
洛杉磯
其他美國地區
香港 台灣 北美
 
2015年02月03日

女神tea time:樓價打殘創業夢 - Fifi

香港創業氣氛前景偏向負面,原因離不開高樓價。 資料圖片

馬雲忽然愛港,豪擲十億支持香港後生仔,喺阿里旗下平台上創業。由業界搞嘅基金,至少會更明白創業家嘅需要,又唔需要好似拎政府資助時咁,做太多無謂文書工作,成效相信會比政府好。不過菲菲對香港創業氣氛前景都係偏向負面,原因離不開高樓價。後生仔冇錯係大把青春,創業輸咗咪再嚟過,問題係香港創業嘅機會成本太高。
一個後生仔打咗幾年工,儲到嚿錢,當然可以拎去創業實現自己理想,但問題係創業係贏係輸,要搞幾年先知答案,但假如佢拎同一嚿錢去買樓,幾年後基本上係賺硬。咁創業就預咗要放棄炒賣,點解外國人可以放棄,香港後生仔就唔得。第一,外國樓價冇香港咁癲,另外香港生活指數貴,我相信香港大把臥虎藏龍,問題係好多人面對現實後,都打消創業念頭。所以如果香港要起創業,最少要先解決高樓價問題。
轉講股票,剛獲內房商泛海控股入主,由和記港陸改名嘅中泛控股(715)股價剛調整完成。話說泛海本身規模大,整體資產達到六百億元人民幣。管理層早前都講明,將研究注入成熟資產,達成地產、金融、投資海外的綜合平台。中泛作為香港上市旗艦,而家市值只係七十五億就太睇少佢,冇一百億都唔收貨啦。加上股價經調整後成功破旗,可憧憬向上突破。

Fifi
http://www.facebook.com/lovefrystock
本欄逢周二、四刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載