› 選擇地區
三藩市
紐約
洛杉磯
其他美國地區
香港 台灣 北美
 
2015年02月03日

一周三件:中國光纖超抵 - 錢雋

趙兵任主席的中國光纖,股價夠殘,值博率高。 資料圖片

中國光纖(3777)喺二○一四年十二月授權兩位董事,回購公司最多唔高過5%嘅已發行股份,兼開始喺平安夜action,集團正正喺高增長期,但股價卻插到落一年前起步位,一於跟中國光纖回購行動,執平貨。

受惠國策前景看俏

啱啱喺上月中,中國光纖公佈同河北四方通信、中國電信集團旗下附屬,簽訂框架協議,合作建設同運營光纖到戶基礎設施。呢壇製作,係實現祖國支持民營參與國有電訊業營運嘅例子,而中國光纖亦正式由設備製造商,升級到寬帶接入網絡設施建設同營運商,兼喺未來七年,可以由光纖到戶寬帶收入,同中國電信分成。
中國光纖家陣主打光纖活動連接器同接配線產品,已經食住祖國同海外寬帶入戶政策,而上邊新製作,若果順風順水嘅話,兼可以成為中國光纖新嘅經常性收入,肥過肥仔水。
中國光纖二○一四年上半年,盈利1.6億元人仔,增長咗23%。而集團至上年九月嘅頭九個月份嘅收入,亦都增加咗28%,數據keep住靚仔。係咁意計,中國光纖就快派嘅二○一四年成績單,盈利只係keep喺半年度呢個增幅,上到四億元人仔,預測PE得五倍幾,再加埋新嘅高增長元素,但股價喺八月打後,跌完再跌,兼質番落一年嘅起步位,個價殘到咁,仲唔出手回購,等幾時?
以中國光纖最多可回購八千七百三十萬股計,家陣只係用咗4.1%份額,即約三百八十九萬股咁大把,仲有大把回購空間。又唔怕貨比貨,祖國行家烽火通信,預測二十倍PE樓上,而寶島嘅華星光係十九倍PE,中國光纖平咗近七成。買中國光纖,當現價(1.84元)翻一番,上到近3.7元,預測PE先得十一倍幾,未有耐追到行家。

錢雋
細價股專家
本欄逢周二、三、五刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載