› 選擇地區
三藩市
紐約
洛杉磯
其他美國地區
香港 台灣 北美
 
2015年02月04日

每日一趣:揭民行不跌之謎 - 李可強

民行係民營銀行,生意可以做到咁大,有冇政治後台照住好關鍵。 資料圖片

民行(1988)上周末大地震,行長毛曉峰被中紀委帶走,有傳多位高層與落馬高官令計劃有關係。民行係民營銀行,生意可以做到咁大,有冇政治後台照住好關鍵。照計發生咁大件事,股價應該冧到七彩,但只係禮拜一跌少少,噚日又升番。有消息話,係因為新大股東,被指有太子黨背景的安邦保險背後發功所致。
過去二十多年,民行係內地唯一有牌的民營銀行,非常把炮。上世紀九十年代,盧志強、劉永好、郭廣昌等商界大佬,因民企好難向國有銀行借錢,就自己申請成立銀行。中央當時好難得咁批出牌照,但民行性質就係「民有、國營、黨管」,例如今次落馬的毛曉峰原本就由共青團調過來。
雖然民企股東話唔到事,但佢哋可以通過民行攞到關聯貸款,用於自己生意,所以民行股權同董事會席位,對佢哋非常重要。民行過往曾爆發多次股權爭奪戰,亦都冇沒人可以做到大股東。
但係安邦保險去年大舉入股,唔單止做咗大股東,持有超過20%股權,而過去爭餐死的民企股東,紛紛減持或離場,例如郭廣昌最近就沽晒股份,可能佢哋都心知冇可能同班太子黨鬥。如果清算毛曉峰係安邦保險有意部署,民行股價會跌先奇。

李可強

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載