› 選擇地區
三藩市
紐約
洛杉磯
其他美國地區
香港 台灣 北美
 
2015年02月04日

中環在線:周凱旋一句諗選特首
俾超人哦足兩個鐘 - 李華華

超人李嘉誠嘅紅顏知己周凱旋(Solina)之前一句選特首可以「諗諗」,旋即成為熱話,正當大家以為超人的確唔係打算撤資,點知超人即日澄清話「佢講笑」,搞到大家鬼咁失望,華華日前見到Solina,當然第一時間問佢呢個選特首大計有乜最新發展,心情好靚嘅佢就笑住答:「仲好講,搞到我俾李生哦咗兩個鐘呀!」
Solina雖然話俾超人「哦」,但係佢講呢句嘅時候其實係笑笑口,可見佢同超人嘅關係真係幾sweet㗎。

相關新聞:中環在線:屋企玩cam見傳媒

近期經常公開提超人

佢近年亦確係多咗喺公開場合提起超人,舉例,佢講過超人點解瞓唔着,係擔心世界正面臨三大危機,又形容超人好似唐吉訶德咁有俠義心腸,自己能做好隨從桑丘已經好唔錯。咁隨從俾主子責備兩句,都好正常啫,唐三藏久唔久都會唸下緊箍咒,先逼到孫悟空陪佢取西經啦。
Solina冇繼續透露超人哦佢乜嘢,或者點樣哦佢,佢選特首嘅消息出街嗰陣,佢仍然身在以色列特拉維夫,之後仲要直飛加拿大,要哦兩粒鐘咁耐,斷估超人應該等佢返港,面對面先哦啩。
雖然大家仲未知道將來有冇得揀Solina,華華都不忘向Solina反映民意,話唔少網民都好buy佢,買重佢可以輕易砌低老董力捧嘅梁錦松,同埋有柔性一面嘅葉劉淑儀。不過Solina就冇再正面回應嘞,只係一笑置之,轉個頭就講其他嘢。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載