› 選擇地區
三藩市
紐約
洛杉磯
其他美國地區
香港 台灣 北美
 
2015年02月05日

魚樂無窮:一隻有勢又值博股份 - 唐牛

前輩教落,炒股要睇兩樣嘢,趨勢和值博率。 資料圖片

前輩教落,炒股要睇兩樣嘢,趨勢加值博率。今日推介嘅光伏股君陽太陽能(397),食正趨勢又有值博率,驚喜打孖上。先講趨勢,近期光伏股個勢勁到不得了,龍頭漢能薄膜(566)短短一個多月炒高四成,大股東李河君仲新鮮滾熱辣做埋首富,連王健林同馬雲都唔係佢嗰皮,氣勢一時無兩。連帶散戶愛股保利協鑫(3800)、卡姆丹克(712)都爆上,板塊熾熱指數係極高!
再講值博率,君陽今年升咗幾多?答案係2%!換句話說,追落後空間無極限。唔好忘記,漢能係君陽股東之一,雖然持股量已不足5%,但證明份屬友好關係,漢能市值一千六百四十億,君陽係八億,係漢能嘅0.5%,係咁意分到少少項目餸尾,不得了!漢能年初已發盈喜,預計盈利不少於2.5億,現價市盈率得三倍,平到笑。雖然屬非經常性收益,但公司今年山東項目可帶來盈利,加上國策不斷扶持,前景秀麗。
公司舊年底批股4.44億股,淨集資額七千八百萬銀,上月初又發行一億元票據,子彈上晒,發射只係時間問題。計埋其他手頭資產,君陽市賬率得番0.4倍,漢能講緊7.1倍,唔使用計數機都知君陽有幾殘。再講,之前批股價係0.186元,現價只得0.183元,而家買竟然平過大戶,仲唔入場等幾時?

唐牛
https://www.facebook.com/tongcow88

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載