› 選擇地區
三藩市
紐約
洛杉磯
其他美國地區
香港 台灣 北美
 
2015年02月05日

每日一趣:城鎮化終於死得 - 李可強

過去兩年,時不時有專家財演推薦城鎮化概念股。 資料圖片

過去兩年,時不時有專家財演走出來推薦城鎮化概念股,建材、內需、嬰兒、汽車幾個板塊炒完再炒。但喺過去幾個月,已經幾乎冇人再提,大家都知道政策冇料到。噚日發改委終於公佈城鎮化綜合試點方案,市場竟然冇反應,可見股民已經心死。方案拖咗成年,但之前一日未公佈,都仲可以有幻想,而家終於有咗出世紙,反而變咗死亡證,正式宣告城鎮化概念死得,冇得再炒。
按照呢個方案,城鎮化現時只會有江蘇同安徽呢兩個省,再加其他六十二個中小城市,作為試點。中國有二十四個省份同超過二千個城市,呢個試點範圍,只佔全國極少部分。二○一三年城鎮化最熱炒時候,當時話城鎮化可以帶動二十萬億元投資,而家諗番,恐怕得啖笑。方案話明要到二○一八年後才考慮向全國推廣城鎮化試點地區的經驗。即係話喺未來三年,唔使旨意會有城鎮化大動作。
方案長達二百七十八頁,除咗頭五頁有政策內容外,其他只是將呢五頁內容,喺江蘇同安徽兩個省,以及其他六十二個試點城市,照copy六十幾次。求其成咁,擺到明只係用來交差。至於政策內容全部虛無縹緲,主要涉及戶口同城鎮管理,可以話同投資無關。

李可強

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載