› 選擇地區
三藩市
紐約
洛杉磯
其他美國地區
香港 台灣 北美
 
2015年02月05日

樂香園:網購條數點樣計 - 海迪

有曾打算大搞網購的朋友認為,港視經營網購並不樂觀。 資料圖片

港視網購日前正式開張。海迪望一望,發現寄賣貨品種類頗為雜亂,由近一萬蚊韓國皮褸,到廿幾蚊零食都有,似乎行「大包圍」政策。傳聞港視網購班底主力來自Yahoo,他們搞互聯網理應經驗豐富;但點樣搞零售,消費者心理要如何捕捉,可能要時間揣摩一下。
香港地方小,購物方便,加上人力、運輸成本唔平,限制了本土網購業發展。有曾認真打算大搞網購的朋友,就對港視經營不表樂觀。佢嘗試幫港視計「婆乸數」:一架貨van,一日汽油錢大概要三百至五百蚊,然後每架車起碼有一個司機、一個跟車,每人每日人工五百蚊,即每條送貨小隊,每日皮費約一千三百大元,走唔甩。咁要送到幾多單生意,先維到皮?
假設送貨小隊一日做足十三個鐘,即每個鐘成本一百蚊,一個鐘最多可送幾多次貨?頂到盡,五次?仲要五張單都要在附近區域,並求神拜佛去到唔使等人、中途唔塞車方可做到。假設公司做到咁嘅交易量,每次送貨成本約廿蚊。這廿蚊一係就轉嫁畀顧客,一係就靠做大價單,拉上補下,用毛利吸收咗佢。所以,賣iPhone當然可免費送貨,但如果賣糧油雜貨小家電?咁就要努力啲。
港視現時要買滿四百蚊才免費送貨,方便度一般。除非港視長期提供優惠令價格更有競爭力,又或者貨品極具特色,否則幾難搞。

海迪

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載