› 選擇地區
三藩市
紐約
洛杉磯
其他美國地區
香港 台灣 北美
 
2015年02月11日

每日一趣:證券界悲慘一幕 - 李可強

「327事件」被稱為中國證券史上最黑暗一幕,對內地投資者影響深遠。 資料圖片

四川黑老大劉漢喺禮拜一被處決,佢係當年「327國債期貨事件」四大莊家之一,連同其他三大莊家——魏東、袁寶璟、周正毅,一鋪賺咗超過四十億元(人民幣.下同),同時令無數人傾家蕩產。事隔多年,呢四大莊家已有三人死於非命,仲有一人坐緊監,似乎冥冥中終有報應。
「327事件」被稱為中國證券史上最黑暗一幕,對內地投資者心理影響非常深遠。話說喺一九九五年,當時內地最大券商,萬國證券的總經理管金生睇淡編號為「327」的國債,搞咗個淡倉沽期貨。魏東當時喺財政部屬下中經開公司的話事人,連同劉漢等炒家一齊做莊對賭。
為咗挾淡倉,魏東搵財政部突然發文,話會加大327國債利息,令該債券價格大升。當時萬國證券面臨被挾爆,喺收市前八分鐘,一口氣沽出價值超過二千億期貨合約,終於打爆中經開的好倉,由輸爆變大贏。
點知魏東班人唔肯認數,劇情又再峯迴路轉。當晚九點上交所宣佈該最後八分鐘交易為非法,中經開公司又再倒贏幾十億。而萬國證券就最終破產,管金生被捕判監。但多年後,魏東自殺,袁寶璟、劉漢被槍斃,周正毅被判十七年。世事如棋,內地證券界的慘烈,外人絕對難以想像。

李可強

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載