› 選擇地區
三藩市
紐約
洛杉磯
其他美國地區
香港 台灣 北美
 
2015年02月13日

樓市爆煲藥引 出嚟喇租管

租務管制,簡稱「租管」,聽個名就知道是管住啲租金囉!但是點管呢?查實香港在亞洲金融風暴前實施過,到2004年先正式取消,不過樓市當年無乜起色,所以唔覺得取消咗有咩影響。今日樓價勁升,租金狂飆,見到劏房呎租豪宅價,先至走來話實施「租管」。針無兩頭利,租管有何利弊?

支持租管的原因:

租金年年升,人工就追唔上,個啲買唔起樓,又拎唔到公屋及唔合符居屋資格的夾心階層,無奈捱貴租,自然希望有租金管制啦,唔驚業主大幅加租呀嘛,免得「上屋搬下屋,唔見一籮穀」,再俾佣金、水電、裝修等等,大拿拿一萬幾千,對於捱貴租嘅市民,絕對唔係過眼雲煙。

唔單只咁,家陣啲租約通常一年生一年死,死約完咗,在樓市升到呯呯聲嘅時候,業主大條道理去加租,抱住「你唔租,出面大把人租」嘅心態,租客最終租唔起,被逼遷。如果有咗租管,業主係唔可以貿然斷租,要有理由想收返單位,呢個理由係證明單位是收回自住,如果唔係,要按市值租金租畀現有租客。

反對租管的原因:

從學術來講,干預自由市場,有違本港自由經濟的原則。但呢啲學術嘢與市民關係不大。貼身啲呢講,租務管制間接造成供應短缺,租金上升,最終弄巧反拙。

何出此言?持呢方面觀點嘅人認為,由於租金升幅被鎖死,業主在起租個刻,索性吊高口價,租金短期急升,租客率先受害。而且由於單位一旦出租,租管某程度保障租客為先,包括租金加幅有限制;租客唔滿意租金加幅可以搵政府仲裁。諸多制肘,業主唔敢亂租畀租客,索性丟空個單位喎!不過有啲人話,納空置稅咪得囉!

查實「租管」呢…就「順得哥情失嫂意」,幫到租客就得失業主,幫到業主就幫唔到租客,要在兩者間取平衡,勁難,所以講咗咁耐,都未有咩大進展。

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載