蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年03月04日

中環在線:珠珠走咗 可盈BB又唔做
四叔再失新聞小花 - 李華華

恒基地產(012)主席李兆基(四叔)又要同新聞小花講拜拜喇!唔知點解新聞小花喺恒地打工,都做得唔耐,好似趙海珠做咗半年女樓神就走咗,舊年九月先去恒地做公關嘅「可盈BB」藍可盈農曆年前又拜拜,搞到四叔少咗個靚女員工!

藍可盈想繼續跑新聞

中大畢業嘅藍可盈眼大大,同其他新聞小花一樣,被網民冠以BB暱稱,佢主要喺前線跑新聞,舊年忽然轉行,走去恒地做公關,由頭學起。
據聞,佢九月返工冇耐,四叔就上京會見國家主席習近平,可盈BB都有份跟埋一齊去,見識唔少。不過佢做咗四個半月公關後,發覺自己都係鍾意做傳媒,想繼續跑新聞,於是就請辭,上個月農曆新年前已經離職,近日已返番去大台效力,做番新聞小花。
無獨有偶,前新聞小花兼輪后趙海珠二○一三年底亦都去過恒地,幫恒地營業部總經理韓家輝賣樓,不過珠珠做咗大約半年就離開,轉做全職媽咪。照咁睇,四叔似乎同新聞小花冇乜緣份呀。
不過話時話,傳媒轉做公關的確唔容易,淨係工作模式都要重新適應,做記者係靈活多變嘅工作,做公關多數坐喺寫字樓,而且較多文書工作又要顧及內部溝通,根本係另一個世界。
舊年底轉咗行做安永會計師行公關嘅前新聞小花蔡雪瑩分享話,做記者時,有好多嘢係即日發生,即日做訪問,做公關就要有多啲計劃,個別大型記者會可能要兩、三個月前開始籌備。但佢認為,公關工作較穩定,周末亦多咗時間陪家人,總之各有取捨啦。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載