› 選擇地區
三藩市
紐約
洛杉磯
其他美國地區
香港 台灣 北美
 
2015年03月06日

青心直說:對沖基金中伏 - 胡孟青

一隻早前傳出要賣當借的土豪股,連日來股價突然飆升,玩死了不少看淡該股的對沖基金。 資料圖片

老千計狀元才,局中局提防中伏,橋唔怕舊,歷史可以重演,方式未必一樣,近期發晒癲的一隻大陸首富級股王,猶如數年前另一隻奇股,名字差不多,又係叫阿能,前度夠「懵」、呢隻夠「痕」,升勢同樣一時無兩,同樣由幾毫子一股喪升,升到開巷後順理成章入乜乜指數成份股,博再炒上,再唔係連紅籌甚至藍籌都可以大開方便門,難怪盡吸對沖基金眼球;難道只要市值超過港交所(388)的,交易所就真係唔出得聲?本地券商則基於風險考慮,已即時把有關股份孖展額降至零,已踏上升途的股份被收緊甚至斬孖展,實屬罕見,有評論指收緊孖展效益成疑,原因從大利市機版面及港股通成交活躍榜可見,買賣盤多源自內地。

瘋狂沽空挾鑊甘

繼早前被老外質疑盈利來源過份集中,對沖基金眼見話事人之前通街押股按倉,以為老闆窮途末路,睇淡報告空群而出,持續大玩借貨拋空,誰知螳螂捕蟬、黃雀在後,結果被土豪南下飛彈擊中,時辰到卻冇貨回補空倉,焗住高位追貨,遂出現「多殺空」,對沖基金紛紛中伏,土豪變相為國爭光,一雪八國聯軍國恥,實行勝利大逃亡。對沖基金經理其實都只係人,對住一隻發行量逾數百億股、老闆又捧住公仔紙到處押股借孖展借到路人皆見的股票,邏輯判斷老闆肯定唔掂,再加上可以借貨沽空,自然滿以為食硬呢碗大茶飯,果然道高一尺、魔高一丈!
呢個故事教訓大家,千祈唔好睇死任何一隻妖股,坊間幾許停牌多時的妖孽,復牌後人與股仍行得走得,可以自發call輪而又有人肯要的,難怪更當正自己係藍籌,只怕我等唔敢懶醒、只夠膽剝住花生等睇大龍鳳的塘邊鶴,眼見越老越大膽的「old嬋」如狼似虎般跳進火坑亦不便多言,因阻人發達猶如殺人父母。
有財經版記者眼見大千世界奇觀,關心市場上流通街貨是否夠冚被沽出貨源,致電證監會SFC查詢,卻換來例牌式官腔:「我們不能評論個別股份,請留低閣下電話號碼,再覆!」小記冇癮,慨嘆難道是否社會輿論聲音仍未夠大,這個場才會如此放肆?老千大賊橫行無忌,有牌無牌水佬助紂為虐,監管機構竟可視若無睹,小散戶可做的,一是趁今日驚蟄往鵝頸橋底打小人,二是自求多福節哀順變。

胡孟青
獨立股評人

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載