› 選擇地區
三藩市
紐約
洛杉磯
其他美國地區
香港 台灣 北美
 
2015年03月06日

一周三件:信達超平值博 - 錢雋

侯建杭任主席的中國信達,各瓣主打業務食住阿爺放水勢頭,前景看俏。 資料圖片

中國信達(1359)各瓣主打業務,食住阿爺放水,信達肥仔水,但家陣仲喺超低單位數PE,比起場內券商股,平咗一大截,殘到爆!
信達主打不良資產經營、資產管理同投資,同金融證券三大瓣數,財政部揸足內資股二百四十六億股,社保基金亦揸住集團兩成半嘅H股。信達係龍頭級數兼有星級股東。
啱啱喺過去二○一四年上半年,信達嚟自不良資產經營嘅稅前溢利五十三億元(人仔.下同),係最大份。但後邊兩瓣業務嘅稅前溢利,講緊都達到22.5億元,唔嘢少之餘,兼多過銀河證券(6881)同期稅前溢利17.7億元。

目標睇升24%

後邊銀河證券,就算計埋呢期調整,一年累計都升咗七成過外,信達又點?一年累計係跌咗16%。又場內券商大孖沙摩通,就用信達同內銀股做比較,特別針對不良資產經營呢瓣業務PB,得0.7倍,亦低過內銀平均0.95倍,信達係大平賣。
事實亦係咁,尤其係阿爺上年尾開始放水,兼有勢越放越行,券商內銀受惠嘅因素,信達一樣瓣瓣食到應一應,喺嚟緊日子,係等豐收,股價仲要兜頭質,冇譜。場內專業評估,信達今、明年度EPS 0.51同0.62港銀,現價(3.73港元)預測PE,得7.2倍同6倍。上邊銀河證券明年度預測11倍PE,又同樣祖國券商股,中信証券(6030)明年預測16.7倍PE、海通證券(6837)13.2倍PE,信達起碼平咗45%。
呢轉煲信達,係咁意以摩通定價4.6港元做目標,講緊要升24%,又信達以另外一眾大孖沙所定5蚊到5.78港元做目標,係講緊要升35%到55%不等。到時集團預測PE,先上到9倍,未有耐追到上邊券商股。

錢雋
細價股專家
本欄逢周二、三、五刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載