› 選擇地區
三藩市
紐約
洛杉磯
其他美國地區
香港 台灣 北美
 
2015年03月06日

中環在線:楊偉雄賣樓鋪鋪賺
與老婆共揸六千萬豪宅 - 李華華

楊偉雄曾經買賣豪宅大賺千五萬。

最近嘅科技界紅人唔係阿里巴巴老闆馬雲,而係特首梁振英新近委任為行會成員兼創新及科技顧問嘅理大前副校長楊偉雄。大家都話佢𠵱家做唔成局長,只得行會成員每月七萬幾蚊份糧,奀豬好多。不過佢係「風扇大王」翁祐女婿,兩公婆各自持有一個傳統豪宅單位,估計市值合共六千萬元,或者佢都唔志在局長份糧呢!

相關新聞:中環在線:外父同梁振英早認識

曾沽樓一鋪賺千五萬

翻查資料,楊偉雄與太太翁少琼以前間唔中都有買賣物業賺錢,不過唔算頻繁。佢哋最叻係喺一九八七年、聯名以兩百萬樓下買入渣甸山柏麗園一個單位,持貨廿年沽出,賬面一鋪勁賺一千五百萬元;佢哋另外有兩個聯名物業,沽出後亦賺近兩百萬元。楊太自己持有一個太古城單位,沽出後亦執到過百萬元。
楊太自己其實揸多啲貨,共有兩個舖位同埋一個淺水灣冠園豪宅,呢個豪宅現估值超過四千五百萬元。據講,楊偉雄家住淺水灣,可能就係楊太持有呢個單位嘞。楊偉雄本人就只係持有一個薄扶林碧瑤灣豪宅,仲係三年前先至買,𠵱家估計市值約一千五百萬,升值咗少少。
老實講,一般市民都唔係好明白梁振英政府點解咁急切要開個創新及科技局,楊偉雄如果做得成局長就有近三十萬月薪,雖然𠵱家做乜乜顧問兼行會成員只袋七萬,但佢應該好樂意袋住先,反正佢兩公婆淨係揸住兩個豪宅單位都值六千萬元,咪袋住先囉。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載