› 選擇地區
三藩市
紐約
洛杉磯
其他美國地區
香港 台灣 北美
 
2015年03月17日

一周三件:銘源瓣瓣好景 - 錢雋

買銘源醫療既可博有盈喜,又可博主打業務食住國策而有好前景,值博率高。 互聯網

銘源醫療(233)由二○一三年全年大出血十億元,去到去年上半年大賺五億元,喺嚟緊全年成績單,有得博盈喜之餘,主打瓣數,又食正勁好前景嘅醫療市場,掂過碌蔗。銘源主打檢測癌腫瘤嘅蛋白芯片、HPV病毒診斷試劑盒,同癌症標靶治療。去年上半年,銘源盈利大幅增長二十二倍,去到5.1億元,就快派二○一四年成績單,就算以呢條數入賬,已經有盈喜,PE得兩倍。

估值平絕同業

銘源五億元盈利主要係受惠一項已撇銷應收款回撥,但要咁睇,隨住款項回收,銘源去到上年六月嘅現金高達6.6億元,減埋借款2億元,淨現金仍高達4.6億元,超級銀彈博有甜品派送,兼絕對有利集團東征西討。尤其銘源前兩瓣業務,好關係到醫療保障、保險,同生活水平,自我保健意識提高。據統計,祖國去到二○一三年合資格參與基本醫療保險制度人數上到5.7億人,係二○○○年時十三倍,又城鎮人口所佔全國人口比例,上到53.7%,潛在客戶增加,就係優勢。
又根據國際癌症研究署預測,祖國癌症人數,會由二○○三年時三百零六萬人,大增63%,到二○二○年時四百萬人。另統計數字,北京喺呢十年間,肺癌發病率係增加咗43%,空氣、食物、水源污染,加埋都市人唔健康習慣,全部都係誘因。銘源標靶治療,亦食到應一應。
祖國有搞靶向醫療嘅恒瑞醫藥,一年升咗四成,市值高達八百億元,係銘源近十億元市值嘅八十倍,PB家陣8.6倍。又海王生物5.4倍PB、海正藥業2.6倍,銘源喺半年底,現價(0.234元)PB得0.84倍。呢轉博銘源盈喜,跟手博主打瓣數好前景,當翻半番到0.34元計,PB先上到1.2倍,比起上邊最平嘅海正藥業,講緊仲有五成過外折讓。

錢雋
細價股專家
本欄逢周二、三、五刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載