› 選擇地區
三藩市
紐約
洛杉磯
其他美國地區
香港 台灣 北美
 
2015年03月17日

中環在線:一早減糖 飲可樂會飲Zero
陳家強最想減卡路里 - 李華華

身形幾弗嘅陳家強原來一早就減糖。  設計圖片及對白

政府新近成立一個名字水蛇春咁長又騎呢嘅「降低食物中鹽和糖委員會」,仲搵來出名飲食健康嘅行政會議成員陳智思做主席。財經事務及庫務局局長陳家強當然就唔直接評論呢個委員會喇,佢只係好抵死咁話,自己一早減糖,若然有個減卡路里委員會就會想參與喎。

放假睇《馬丁路德金》

陳家強確係一早減糖,唔講唔知,佢好鍾意飲可樂,食飯一定要叫罐可樂,佢唔飲普通嗰款,一定係要無糖可樂(Coke Zero),話要減糖。
但作為財金官員,「減糖」似乎唔多啱市民口味,所以佢噚日同傳媒茶敍嗰陣都話,冇乜興趣做減鹽糖委員會嘅委員,之但係,如果有個減卡路里委員會,佢就可能考慮參與,隨順幫自己減埋卡路里咁話。
其實陳家強嘅身形都算幾弗,起碼見唔到有大肚腩,照計佢食嘢時,都未需要計住各類食物嘅卡路里先食。聞說,佢冇特別做乜嘢運動keep fit,佢嘅主要運動係打高爾夫球,此外,平時都會學財爺曾俊華,走去睇戲輕鬆下。
下月復活節,陳家強已經諗定會留港消費,兼且入場睇番場戲。問到佢會唔會睇同香港雨傘運動拉上關係嘅奧斯卡得獎電影《馬丁路德金──夢想之路》,佢好爽快咁話有興趣睇,仲問上畫未,似乎唔多擔心俾人話佢勾結外國勢力,暗撐顏色革命。
不過,叫佢學財爺咁,同一班傳媒行家玩selfie(自拍),佢竟然就耍手擰頭,話要留番畀財爺,似係費事東施效顰。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載