› 選擇地區
三藩市
紐約
洛杉磯
其他美國地區
香港 台灣 北美
 
2015年03月18日

【YouTuber搵銀術】
司徒夾帶:我要做網絡界Paco!

現今只要你肯全職拍片放上網煲Like煲人氣,人人都可以叫自己做YouTuber,不過,本地YouTuber界中流砥柱,人稱「師傅」的司徒夾帶(真名陳學鳴),直言行業前景實未如大眾想像般風光。為求出路,他一直物色有潛質的YouTuber,收歸旗下YouTuber經理人公司,直言:「我想做網絡界Paco」(Paco為有「金牌經理人」之稱的黃柏高)。

「香港YouTuber市場係大咗,但應該冇樓價膨脹得咁快。」司徒夾帶自09年惡搞司徒法正後上位,至今YouTube頻道累積訂閱人數18.6萬,facebook專頁粉絲數目14.6萬,至去年4月,更索性成立經理人公司vlogger,統籌旗下9至10位YouTuber廣告工作,曾捧紅現已轉投英皇娛樂之「女師傅」岑紫生,以及魔術師Miss Hunny何穎璇。

隨著市場對網絡行銷的重視,加上公司積極「造星」,令YouTuber相關業務收入,近年平均增五成至一倍。不過,「好多人覺得我拍好多廣告,但我推咗嘅其實更多。」他指出,不少品牌仍未了解,網絡與傳統電視廣告是兩個世界。「Hard Sell唔緊要,如果你識用網絡文法去做,係OK嘅,但當我同佢哋解釋嘅時候,佢哋係唔明。結果佢哋條網片,剪出嚟把VO聲係電視聽到嘅VO聲,加埋電視級數嘅Graphic,我喺網絡上見到一定唔睇。佢哋永遠用電視廣告把尺去做網絡廣告,係唔可能成功。」

不少網絡紅人一開始拍片,出發點都是純粹「開心Share」,司徒夾帶亦不例外。然而,每當YouTuber開始於影片植入廣告,都會受到網民抨擊。「香港人係唔習慣俾錢睇嘢,佢唔俾錢你都唔夠,仲要唔鍾意你搵錢……佢哋認為YouTuber係應該無償地拍片去娛樂佢,而我哋係唔使食飯。」

雖然YouTube會向頻道內容供應商提供廣告分成,然而司徒夾帶指出,礙於廣東話市場局限,因此香港YouTuber根本無可能單靠分成搵食。以司徒夾帶的頻道為例,即使累計100萬點擊,每月只獲4位數字分成。他表示,公司銷售團隊有近十個,令業務管理專業化,是其中一個出路,「我深信所有YouTuber都唔能夠自我管理,包括我自己。我哋係唔想做嘢,唔想同客傾,所以我要搵一隊人去管番我地,話俾我地聽,幾時要做啲咩,俾番個框架自己。」

另外,為開拓新市場,司徒夾帶表明,正考慮於內地影片平台如土豆、優酷開新頻道。被問及會否為內地市場,自我收緊「抽水」力度,司徒夾帶強調不會收火,「我嘅Style都係抽水講笑,咁陶傑都未死啦。如果有日我見到佢死咗,咁我先會開始驚。」實行錢照搵,水照抽。

對YouTuber來說,要保持人氣,facebook是另一個必然的戰場。不過,近年facebook為推廣自家影片功能,刻意打壓YouTube的曝光率,首當其衝的是YouTuber。司徒夾帶透露,目前正建立一個「香港版YouTuber」平台,冀可聯結香港所有YouTuber合作,以打破兩個平台的制肘,「我想有啲嘢俾人睇先同佢哋傾,我個人係吹水啫,我做嘢唔係吹水。」

他概嘆指不少香港人崇外,欠缺本土意識,「香港人有得揀,係會揀食拉麵、壽司,係唔會食雲吞麵。就算全世界係有好多雲吞麵既fans,但香港人唔支持雲吞麵,雲吞麵係會死。」冀港人多欣賞本地製作。

記者:倪敏慧
攝影:馮就康

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載