› 選擇地區
三藩市
紐約
洛杉磯
其他美國地區
香港 台灣 北美
 
2015年03月18日

魚樂無窮:勤達上演醜股大翻身 - 唐牛

勤達最新市值4.4億元。 資料圖片

香港悲情指數創新高!不是嗎?唔想佢升嘅樓價係咁破頂,想佢升嘅股市就死水一潭,套樓買股嘅更加係雙輸,慘慘慘!指數弱爆,個股飛天,從後者埋手準沒錯。頭盤睇彩票股,眾彩(8156)第二日爆升,見底味濃,唔通行業整頓有好消息跟尾?華彩(1371)喺低位徘徊多時,也可望實有冇異動。
主菜依舊係殼股,冇計,萬千寵愛在一身。勤達(1172)失驚無神搶高兩成,究竟所謂何事?回帶去番舊年,勤達曾經二供一集資1.1億,供股價0.1元,集資用作增加庫存及還債。再睇勤達背景,以印刷業務起家,近年染指墓園生意,但業績一直冇起色,二○○九至二○一三年滿江紅,累計蝕咗足足三億,就算去年中期轉虧為盈,都係靠非經常性收益,管理層意興闌珊是常識吧,由呢個角度出發,供股集資順道收乾貨源為賣盤鋪路,變得合情合理;勤達大股東為莊士系,乃老牌華資地產商,頭腦精明持股逾六成,如果睇錢份上,要轉手易過借火。
從投資角度出發,勤達供股後股價了無起色,一度插穿供股價,最新市值得番4.4億,連殼價都未夠,蔗渣價錢燒鵝味道,惹來資金炒作好正常,跌足半年噚日終於行第一棍,以近期疑似賣殼股可以翻炒再翻炒嘅氣勢,點計都唔會咁短癮囉。炒上NAV價0.189元,講緊四成水位!

唐牛
https://www.facebook.com/tongcow88

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載