› 選擇地區
三藩市
紐約
洛杉磯
其他美國地區
香港 台灣 北美
 
2015年03月18日

一周三件:國際精密翻身 - 錢雋

崔少安任主席的國際精密,毛利率上到26.3%,為六年最強。 資料圖片

國際精密(929)就快派二○一四年成績單,有盈喜之餘,近年成功開多條汽車零部件瓣數,繼續帶動集團谷底大翻身,博國際精密可以上番一字頭。

毛利率六年最強

國際精密主打精密金屬零件製銷,兼獲得AS9100呢個極嚴謹嘅航天認證,講技術水平,又係架勢堂嘅級數。喺啱啱過去二○一年上半年,國際精密就虧轉盈四千一百萬元,而集團近年積極拓展汽車零部件,呢半年成績單睇到,國際精密由原先好依重嘅電腦硬盤驅動器(佔以往銷售六成比重),去到驅動器、汽車部件,同液壓設備零件三瓣,平分春色,唔使靠晒單一瓣數,因若過份靠晒單一瓣數,一旦唔掂,業務會起波動情況。
再講,國際精密呢期毛利率,上到26.3%,靚過晒對上五年度嘅數據,所以,有理由相信,尤其係液壓設備同汽車部件發力,國際精密毛利相當靚仔。
又之前主打上海集優(2345)講過,環球經濟回暖,業內著名研調機構Fourin預測,今年全球汽車銷量,會歷史性突破九千萬輛大關,增幅近4%。又油價大跌,亦有聲音指出,或者會刺激購買汽車嘅意欲。
國際精密開拓新瓣數,食應汽車需求潮,喺二○一四年成績單盈喜基礎下,今年表現繼續向上,成績單照計keep住係靚仔。當國際精密喺嚟緊嘅二十三日派上年成績單,EPS九仙,今年係咁意增長兩成到0.11元,預測PE得6.7倍。
又國際精密現價(0.74元)比起二○一一年的1.8元高位,係跌咗六成,得0.46倍PB,買國際精密,當上到一字頭,講緊要升近四成,今年預測PE先得9.3倍,PB仲喺一倍樓下,兼未有耐去番二○一一年高位,而當時集團嘅PB,係講緊1.3倍。

錢雋
細價股專家
本欄逢周二、三、五刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載