› 選擇地區
三藩市
紐約
洛杉磯
其他美國地區
香港 台灣 北美
 
2015年03月19日

魚樂無窮:大股東夠旺耀才抵博 - 唐牛

耀才證券近三年盈利以雙位增長。  資料圖片

月初叫大家破位追入阿里影業(1060),九日下來勁升三成,和味指數五粒星。順藤摸瓜,騰訊(700)揸住11%股權嘅華南城(1668)近日見異動,以騰訊增持價3.36元計,現價華南城深潛三成,博馬雲效應後有馬化騰效應,𥄫完華南城。
大市再炒深港通,券商股鑊氣十足。今日推介耀才證券(1428),有力大棍破頂!點解咁有信心?先睇公司業績,近三年盈利全部雙位增長,上月初發盈喜,最新十個月盈利已超越上年度總額,今年保守估計賺兩億,市盈率僅十三倍,以增長股嚟講絕對唔貴。
大股東兼老闆葉茂林,近期成為B疊大紅人,無他,旗下夜場股Magnum(2080)上市一年極速賣盤,新買家為內地家電集團奧克斯董事長鄭堅江,業務包括家電、地產、電訊同醫療,資產超過三百億人仔!Magnum停牌前市值只得五億,復牌後肯定大炒特炒,耀才沾少少旺氣,不得了!再講,葉茂林輕輕鬆鬆袋四億,講明要集中火力搞好耀才,希望三年後成為內地華資行一哥,以其超強人脈關係,無論透過自身增長抑或搵猛人入局,要達標話咁易。睇睇有強國阿媽撐腰嘅海通國際(665)同國泰君安(1788),市值全部過百億,耀才只得奀豬二十七億,大把世界,噚日破三角嘅一棍,相信只係大茶飯嘅前奏。

唐牛
https://www.facebook.com/tongcow88

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載