› 選擇地區
三藩市
紐約
洛杉磯
其他美國地區
香港 台灣 北美
 
2015年03月19日

中環在線:銀行搵靚女員工助陣
變身model 幫東亞宣傳 - 李華華

三位靚女員工幫銀行做宣傳,成功搶鏡。 資料圖片

最近睇得最多嘅電視廣告,應該係國泰(293)空姐行來行去宣傳月底舉行嘅七人欖球賽,要講經常用員工賣廣告嘅公司,國泰敢認第二,應該冇其他公司敢認第一。之但係,華華發現近年銀行界都興起搵靚女員工幫手做宣傳,好似東亞銀行(023)噚日就搵一位年輕靚女同事宣傳旗下一間數碼化分行嘞。
其實銀行搵靚女同事幫手做宣傳都好啱數,𠵱家好多銀行都想飛甩老土感覺,吸引年輕顧客幫襯,擺個靚女出來就最容易吸睛。與其專登畀錢請模特兒,不如喺銀行裏面物色靚女同事幫手,一來銀行可以省錢,二來亦可以令有份參與嘅同事感覺良好,一舉兩得。

上商有靚女駐守分行

好似舊年底,中銀香港(2388)換制服,就搵來幾位靚仔靚女同事做模特兒,示範男女裝新制服;有超過六十年歷史嘅上海商業銀行今年初將一間分行翻新重開,甚至聘請一名年輕貌美嘅e-ambassador駐場宣傳兼吸客。
東亞銀行噚日介紹灣仔一間新嘅數碼化分行,亦都有一位靚女同事出現,佢負責介紹分行裏面一個數碼化傳單裝置。
簡單嚟講,係叫客人拎部手機「嘟」屏幕上嘅QR Code,咁就可以睇到銀行各類產品嘅傳單,紙都慳番。有靚女在場,噚日有份介紹呢間分行嘅東亞太子爺李民橋當然搶唔到鏡喇。
不過話時話,東亞應該有唔少靚女,舊年中佢哋位於銅鑼灣嘅數碼分行開幕,分行經理Abby嘅樣貌酷似歌手梁詠琪(GiGi)。其實佢哋可以考慮好似國泰咁,齊集一班靚女同事拍平面或電視廣告,唔打得都睇得吖嘛!

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載