蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年03月20日
馬上成為壹會員

中環在線:唐家成又抱孫
自誇唱歌𠱁細路好叻 - 李華華

唐家成一講孫仔孫女就笑晒。

證監會主席唐家成下個月復活節將會好唔得閒,佢唔係要周遊列國四圍走,而係要留港湊孫,事關佢女兒舊年底生多一個bb仔,加埋兩歲幾嘅大孫女,唐家成要幫手湊住兩個寶貝孫,分分鐘仲忙過退休之前。
唐家成噚日跟傳媒食晏,一講到上個月農曆新年做過乜,嚟緊復活節又諗住去邊度玩,佢就笑笑口咁自爆,話啱啱多咗粒三個月大嘅孫仔,孫仔嘅英文名叫做Lucas,加埋兩歲幾大嘅孫女Sophia,正好湊夠一個「好」字,認真要講句:恭喜晒!

女兒誕男B湊個好字

唐家成一講孫仔孫女就笑晒,仲好得戚咁話自己湊孫好叻,佢會唱歌𠱁佢哋瞓覺,不過佢就唔肯講佢嘅首本名曲係乜東東。
唔講唔知,唐家成嘅太太係英國人,阿女就嫁咗一位外表似歐洲人嘅黎巴嫩人,換言之,佢一對寶貝孫就有一半黎巴嫩血統,四分之一中國同埋四分之一英國血統嘞。咁嘅組合,長大後,肯定係靚仔、靚女喇。
唐家成除咗係證監會主席,仲係體院同英基主席,照咁睇,佢喺體育界同教育界都應該識唔少人,將來孫仔孫女讀書或者要發展邊方面嘅體育運動,應該都易過借火。
不過又咁講,唐家成雖然識得人多,二○一一年退休前做到畢馬威會計師事務所亞太區主席,計數都肯定難唔到佢,但佢竟然唔識得上網認購滙豐百五周年紀念鈔呀。
滙豐紀念鈔本周六截止認購,唐家成話,一早有興趣買,但之前攞唔到申請表,於是就放棄咗。佢知道可以上網申請,但以為手續繁複,加上佢唔係諗住買兩萬四蚊最貴嗰款,咁就費事搞,不過噚日當佢知道網上手續簡便,佢就話會返去試試咁話。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載