蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年03月22日

大棋局:耶倫繼續凌波微步 - Mr. Tregunter

耶倫繼續凌波微步,用意在壓水花,將衝擊壓到最細。 資料圖片

聯儲局三月會議聲明,前瞻指引刪除「耐心」用詞,但新聞發佈會上耶倫又補兩句「不意味着六月一定會加息,儘管我們還無法排除這一可能性」,煩過羅家英飾演的唐三藏。
其實近一年來,聯儲局玩pattern分靜態同動態兩款。遣辭措意屬靜態,由相當長一段時間低息,改為對加息保持耐心,再而刪除耐心字眼,向加息目標進發明顯不過。但美國嘅貨幣政策對世界影響太大,根據國際清算銀行報告《Global dollar credit: links to US monetary policy and leverage》,現時美國以外地區發行嘅美元債券,已經達到九萬億,所以聯儲局每次講加息問題都要補句回馬槍。
動態方面,就係將市場預期壓縮。留意近一年聯儲局控制市場預期,由停QE開始→扮討論會唔會加息→改為討論要唔要提前加息→最後變為六月定九月加息。回望一年來情景就明白,一年前仲講緊會唔會加息,半年前已唔覺意改為要早啲定遲啲加,一年後變成六月定九月加。
如果用炒股角度去講,也就係頂越來越低,底越來越高,一個收窄三角形。耶倫繼續凌波微步,用意在壓水花,將衝擊壓到最細。講白啲,即係要你唔敢賭單邊。接下來六月定九月加息已唔重要,但可預期,當開始加息時,耶倫將會以「can take me取西經」式演說反反覆覆地講:雖然加息,唔代表會個個月加,或之後應該唔加,但又唔排除繼續加嘅可能。

Mr. Tregunter

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載