› 選擇地區
三藩市
紐約
洛杉磯
其他美國地區
香港 台灣 北美
 
2015年03月25日

魚樂無窮:殘爆科網股浴火重生 - 唐牛

慧聰網昨日以大成交突破阻力區。圖為集團行政總裁兼執行董事郭江。 資料圖片

A股十連升,創下22年最長升浪,成交更突破1.4萬億,宇宙最強!雖鑊氣沖天,但未見有官媒吹淡風,阿爺已為新一輪升市開綠燈,相信滬綜指好快見4000點。恒指雖未見突破,但個股已靜靜起革命,向大陸靠攏,科網股走勢最凌厲,無他,李克強喺兩會狂sell互聯網+概念,咁大個生招牌,資金喪炒是常識吧!
今日推介慧聰網(2280),一個字形容︰殘!舊年高位23.65元,而家?7.89元!唔見咗六成有多。點解咁陰公豬?因為盈利增長放慢,要留意係放慢,即係仲有增長,頭三季盈利按年分別升109%、88%及25%。「理鬼你係咪增長吖,總之交唔到數就要沽!」我認同,但現價預測PE只得16倍,作為內地B2B電子商務營運商二哥,未免太便宜,睇番一哥阿里巴巴預測PE接近40倍,更突顯慧聰網蔗渣價錢燒鵝味道。
再講,公司新近以15億人仔,收購包括中關村在線在內三大網站,拓展消費電子產品戰線,增長動力有望回復,券商建銀國際大派定心丸,認為收購令慧聰網可接觸優質客戶,從以提升盈利能力。事實上,公司轉板後一直未炒過,今次有新增長引擎,勢必惹來基金追捧,趁早上車有着數。從圖表分析,慧聰網以大成交突破阻力區,大型反彈浪已成,以圓底頸線做目標,可見10元,水位27%!

唐牛
https://www.facebook.com/tongcow88

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載