› 選擇地區
三藩市
紐約
洛杉磯
其他美國地區
香港 台灣 北美
 
2015年03月25日

一周三件:江南等住落鑊 - 錢雋

芮福彬任主席的江南集團,受惠國策,主打業務產品需求增,前景看俏。 資料圖片

江南集團(1366)承接住上年靚仔嘅業績,喺阿爺繼續大力推動電網同埋鐵路基建嘅瓣數底下,今年嘅成績單,keep住靚爆鏡,得超低單位數PE,仍然係好抵搞。
江南主打嘅係電線、電纜同相關裝備,兼且係祖國最大產品製造商之一。而且集團啱啱派冇耐上年度成績單,盈利增長咗24%,到6.3億元人仔,而嚟自祖國嘅營業額,高達78億元人仔,增加咗近30%。

電線電纜產品需求殷

新一屆領導層打貪,大型國企實施中央招標,確保「陽光採購」,訊息要公開、全面、徹底,唔係靚嘢唔收貨。睇到嘅係,喺咁嚴格招標制度下,江南祖國收入有靚仔增幅,證明咗集團產品有優勢。
據中電聯網站新鮮熱辣數據,祖國並網風電裝機容量,首次突破1億千瓦。風電設備猛起,但輸電仍然有樽頸,諗到嘅係,喺環保國策底下,對電線電纜需求會好爆。而國家電網亦計劃投資4,200億元人仔,喺電網建設。
又阿爺亦講到明,今年鐵路投資,keep住8,000億元人仔額度。呢個瓣數,亦都刺激江南產品需求,江南仲唔掂過碌蔗?
江南連埋去年配股攤薄全面反映,係咁意估佢今年EPS,增長15%咁大把,去到0.28元,現價(1.62元)預測PE,得5.7倍。呢個盈利增長,仲係未計日後喺一帶一路底下,周邊國家所帶嚟嘅勁厚商機。
咪扯咁遠,家陣祖國行家嘅預測PE,係講緊20到40倍,江南已經大平賣。繼續煲江南,喺現水位翻半番到2.4元計數,今年PE仲係得8倍幾單位數,好抵博。

錢雋
細價股專家
本欄逢周二、三、五刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載