› 選擇地區
三藩市
紐約
洛杉磯
其他美國地區
香港 台灣 北美
 
2015年03月25日

中環在線:信置兩少爺齊搞環保
推出空氣淨化巴士站 - 李華華

空氣淨化巴士站要用電至可以運作。

近年好多富二、三代陸續加入家族企業學接棒,佢哋學做生意之外,亦十分重視企業形象同埋企業社會責任(CSR),於是各適其適,出錢出力支持本地藝術、環保、保育等活動,信和置業(083)第三代黃永光(Daryl)與細佬黃永龍(David)似乎比較鍾意推動環保,新近推出一款空氣淨化巴士站。
信置主要係賣樓,Daryl兩兄弟忽然與奧雅納工程顧問共同研發空氣淨化巴士站,實在係風馬牛不相及。

相關新聞:中環在線:黃永光跟細佬學玩fb

研發太陽能版本

David就解釋,佢三年前從美國大學畢業回港後,一直有鼻敏感,家人為佢喺家中與寫字樓擺放空氣清新機。咁啱佢見哥哥舊年推動研究大廈水力發電,於是喺半年前開始構思研發呢個空氣淨化巴士站,純粹為推動環保,想幫大家呼吸新鮮空氣。
矛盾嘅係,呢個空氣淨化巴士站雖然話可以有效減少空氣污染物濃度平均40%,之但係,成個系統係要用電先至可以運作,咁咪一樣唔環保囉?David似乎料到有此一問,即刻話佢哋已經研究緊第二代,希望第二代可以加上太陽能板,方便以太陽能發電。
暫時佢哋投資咗60萬元落呢個研究,Daryl透露,一個空氣淨化巴士站嘅造價大約13萬元,呢個巴士站𠵱家放喺旗下灣仔新盤囍滙地盤裏面,繼續進行數據分析,佢希望將來可以跟政府部門或者巴士公司合作,佢哋𠵱家就為呢個設計申請緊專利。

【話你知】
呢個系統將空氣由置於底部嘅入風口抽入過濾裝置,清除空氣中微細懸浮粒子,淨化後嘅空氣由頂部出風口排出(箭嘴示)。巴士站設計形成屏障,可阻止污染物進入。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載