› 選擇地區
三藩市
紐約
洛杉磯
其他美國地區
香港 台灣 北美
 
2015年03月31日

智取大市:中資股先食糊後低吸 - 晉佳

內地容許冇合格境內機構投資者(QDII)資格嘅公募基金買港股,對港股短線刺激作用,猶如舊年4月炒滬股通嗰一役咁犀利,大可稱之為港股通2.0版本。
中證監喺呢個時候容許公募基金買港股,或許因為中央覺得,A股累積升幅唔少,而家係時候疏導A股投資者嘅資金買較平嘅H股,按理內地A股會有短期壓力,殊不知滬綜指噚日仍升超過2%,一嚟反映中央想壓都壓唔住A股,二嚟反映內地A股上升動力相當強勁。
晉佳相信呢種牌面睇形勢大好嘅市況,已吸引到靠股價momentum搵食嘅短線投資者掃貨,呢班人正正係近年最積極買港股嘅投資者,如果佢哋耗盡子彈,短線可能會令大市欠缺承接力,而出現調整。
另外,晉佳觀察舊年4月炒作滬港通消息時嘅港股市況,最強勢嘅大折讓H股,喺滬港通公佈後,爆升一日半就短線散水,調整1個月左右先至進入慢牛格局。
如果港股通2.0同舊年4月炒作手法同出一轍,噚日爆seed嘅大價中資股,就有可能喺今朝開市早段爆上然後出現調整,調整大約1個月過後,先有機會步進慢牛格局,下半年開始正式進入中資股大牛市,情況一如舊年嘅大折讓H股。

成交破1,500億無難度

前車可鑑之下,踏入4月,中資股表現可能偏向反覆,timing係咪咁準確?唔敢講,但晉佳偏向視今朝為中資股短線食糊機會,然後轉吼其他基本因素良好、股價開始轉強嘅二、三線股,搵唔到對象寧願坐多啲cash,再等4、5月吼低位吸納大價中資股。如果閣下今朝先嚟追貨,諗住長坐,4月就可能面對捱價風險,到時震你唔走,你先有本事喺下半年贏錢。
再者,每年下半年係內地嘅傳統放水旺季,過往四年,下半年滬綜指表現偏向好過上半年,加上恒指喺近四年嘅第二季之內都會出現調整,晉佳覺得今年第二季唔會例外,所以都係等調整先低吸仲着數。
往後日子,投資者大概可用噚日升市做下半年中資股揀股嘅指標,噚日升得勁嘅,下半年應更有運行,港交所(388)、內地基建股、大折讓二、三線H股會係相當唔錯嘅備忘對象。噚日港股成交足足有1,408億元,只係略低於舊年成交最高嘅12月5日嘅1,478億元,如果港股下半年進入大牛市,單日成交要突破1,500億元又有何難?到時所有大行又要上調港交所目標價,220元以上冇走雞。要買港交所,唔使今日先嚟追,第二季內應該有更筍位。

晉佳
http://www.facebook.com/pages/ 晉佳/719009541518415
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載