› 選擇地區
三藩市
紐約
洛杉磯
其他美國地區
香港 台灣 北美
 
2015年03月31日

金手指:再不問價追摩比 - 孫柏文

胡翔任主席的摩比發展業績佳,營業額升八成,盈利升逾4倍。 資料圖片

上周孫柏文叫大家不問價追嘅摩比(947)出業績,營業額升八成,盈利升逾4倍,市盈率得番12倍。我去埋佢哋嘅分析員會,講真,市價反映嘅未來係錯晒。呢間嘢嘅訊號塔上4G接收器同天線,香港電訊商測試過都話產品達國際水準。營業額同盈利咁升,市盈率都得12倍,即好多人覺2014年係最高峯,之後冇增長。

4G概念有排玩

佢哋信嘅原因,係因摩比啲客,即電訊商自己話嘅。由中移動(941)話因舊年起咗72萬個站,故今年只起30萬個,到聯通(762)同中電信(728)話今年佢哋各起約30萬個站「就會係4G資本投資高峯」。即係今年玩埋,摩比唔使再做。信的話你就係白癡,因電訊商擺到明要呃你。點解?因大陸假3G實嚇怕人,當年個個諗住3G會好得,點知大陸研發自己嘅制式唔掂,係香港速度嘅一成,除短訊外乜都慢到做唔到。故舊年初中移動話做4G,要2014年起50萬個站後,股價大插落到60幾,因啲人又驚佢哋「為國策」做啲冇回報嘅資本投資。
你會問:「2014年起50萬個站?點解最後會起72萬個嘅?」冇錯,原因係4G用番國際制式,快3G幾十倍,故勁上客。所以點解起72萬個站後,中移股價反而過百。其實舊年全國設備製造生產量俾中移攞晒,原本想起唔止72萬個站。聯通同中電信因3G唔係廢嗰隻要讓中移買先,即今年全國總數100萬個站係低估,但都仲多舊年四成。而因科技嘢研發成本高,每賣多台就平均研發成本跌,毛利再升。
保守估計摩比盈利今年升多五成,仲要玩多好幾年。到市場知嘅時候,即中移又宣佈超額投資時,因PE Growth帶動市盈率唔會係12倍,亦可快上到廿幾三十倍。如果25倍市盈率,昨日收市價1.81元,今年將見3.75元。曾淵滄話三隻大陸電訊股要逢低必買,因4G堅料有排玩,咁摩比仲唔不問價追?

孫柏文
獨立股評人
http://facebook.com/shuen
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載