蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年04月02日

中環在線:前主播蔡雪瑩離開安永
唔做公關 接拍廣告做司儀 - 李華華

蔡雪瑩唔做小花同公關,都仲有好多嘢想試喎。

大台嘅新聞小花一個接住一個走,其中一位小花蔡雪瑩(Snowy)舊年亦轉戰財經界,走去四大會計師行之一安永(EY)做公關,但係做咗半年,佢就另有計劃,今日已經係佢喺EY嘅last day。Snowy諗住將來向司儀、拍廣告、演員等方面發展。

自由身接job搵真銀

28歲嘅Snowy舊年10月離開大台就加入EY,其間EY爆出員工登報鬧高層呢單中環熱話,不過Snowy當時冇直接負責處理呢件事。家陣佢做咗半年就講拜拜,唔通由新聞小花轉做公關真係咁難適應?
Snowy解釋,唔係唔慣做公關,佢跟自己部門嘅同事亦都相處融洽,只係因為離開大台之後,有唔少廣告同埋公關界朋友叫佢試吓拍廣告或者做司儀,佢見到機會湧至,所以就想趁後生兼且冇家庭負擔,接受新嘅挑戰。
佢承認,喺大台做咗四年幾主播,的確累積到知名度,即使𠵱家冇再出鏡報新聞、報天氣,但係出到街都仲有唔少路人跟佢打招呼,佢都覺得好開心。
除咗做司儀、拍廣告,Snowy不諱言,如果將來有電影公司搵上門,而導演又唔嫌棄佢起步慢,佢都會想嘗試做演員。不過,佢暫時都係想做企業、品牌或者新股發佈會司儀兼拍吓廣告做起步先。嚟緊佢仲會幫醫院做訪問兼出書。
冇全職工作在身,以自由身接job係咪搵到真銀呢?佢就話冇認真計過條數喎。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載