› 選擇地區
三藩市
紐約
洛杉磯
其他美國地區
香港 台灣 北美
 
2015年04月10日

中環在線:太地主席 CEO
都有東南亞靚老婆 - 李華華

白德利(右二)同美籍越南太太(左)和兩名子女一齊度假。

聞說太古地產(1972)新任行政總裁(CEO)白德利(Guy Bradley)深得主席史樂山(John Slosar)信任與器重,唔講唔知,兩位有一個共通點,就係同樣娶咗來自東南亞嘅漂亮太太!
太古地產最新一期內部刊物訪問咗今年1月正式上任嘅白德利,由工作情況到個人興趣都有講到,裏面有一張佢嘅家庭照,佢太太原來係美籍越南人,一對仔女就喺英國讀書。

CEO白德利愛玩高溫瑜伽

翻查資料,49歲嘅白德利1987年加入太古集團,曾派駐集團喺香港、巴布亞新畿內亞、日本、中國、台灣、中東、美國同埋越南嘅辦事處,話唔定佢係喺美國或者越南工作期間認識呢位靚女,然後娶得美人歸。
咁啱得咁橋,史樂山太太Joy Slosar就係泰國人,80年代初做過太古集團旗下國泰航空(293)空姐,靚女到俾公司揀做宣傳用嘅紙板公仔,跟史樂山結婚後就專心相夫教子,近年佢間中都會陪史樂山出席太古集團嘅活動。
講番白德利,咪睇佢牛高馬大,佢都鍾意玩女士至愛嘅瑜伽。佢話之前喺北京工作時,曾經練習高溫瑜伽,柔韌性與靈活性都有番咁上下咁話,𠵱家喺香港工作漸上軌道,佢打算重新開始高溫瑜伽課程。另外,佢得閒都會打高爾夫球、網球,仲有跑步。做咁多運動,怪唔得佢身形都算弗喇。

白德利新辦公室要擺風水陣

滙豐銀行御用風水師龍景銓曾經提過,英國人比中國人更加相信風水,原來此話非虛,今年1月升任太古地產(1972)行政總裁嘅白德利(Guy Bradley),返新工之後,都有搵風水師睇睇自己新辦公室嘅風水,風水師叫佢要多放啲植物同水,咁就會帶來好運嘞。
Guy喺內部刊物提到,佢嘅新辦公室暫時冇乜特別裝飾,事關過去3個月忙住交接工作,唔得閒理,但係佢已經搵咗風水師睇風水,風水師話佢辦公室嘅整體風水唔錯,只係建議佢微調一下傢俬嘅擺放位置,放多啲植物同水就得。水為財,植物又有生氣,睇嚟佢嘅辦公室認真好風水,起碼唔使擺啲乜嘢擋煞辟邪。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載