› 選擇地區
三藩市
紐約
洛杉磯
其他美國地區
香港 台灣 北美
 
2015年04月28日

金手指:
一注獨贏買滙豐 - 孫柏文

八年前叫一注獨沽滙豐,今日則叫一注獨贏買滙豐。 資料圖片

今日,呢篇文非常難寫。2007年7月30日,孫柏文寫咗篇題為「一注獨沽賣滙豐(005)」文。嗰篇文第一句同呢篇一樣。嗰日滙豐仲要升,收141元。兩日後上有線節目《Money Cafe》,喺該集因我深信金融危機嚟緊,企硬叫沽清重注花旗國次按嘅滙豐,青姐胡孟青用雞毛掃「啪」一聲打我屁股。

遷冊係要揀靠山

之後兩年滙豐點相信唔使再提,但就係憑嗰篇文,若有呢樣嘢,我應贏咗一次「香港財經演員金像獎最佳男配角」!當年我叫沽嘅原因,就係唔覺佢賬簿啲資產有佢話咁值錢。仲要因股東當時對滙豐根本唔當投資,而係宗教,以獅為神,令市價完全冇反映現實。今次呢?滙豐由千禧年開始學香港政府一樣開始「體恤民怨」,為安撫跑季度業績嘅基金經理,將行之有效嘅「平時極保守,唔憂做咁揀客,等金融危機,賤買資產」變成「積極進取」。仲要喺金融海嘯後,用朋友王弼嗰句,有如末代清廷被列強割據,一刀一刀俾美帝為首嘅政府們咁生劏。令滙豐人頭增長最快嘅部門,就係compliance。唔信?你試吓創業,做金銀實貨買賣生意,跟住去滙豐開戶口?驚你洗黑錢,唔得。
上周滙豐話搬,啲分析員計埋啲乜嘢慳稅、搬遷支出等。有如2007年,白癡。今次重點係佢哋要再揀靠山,英文叫regulatory arbitrage,即揀邊個管兼保護佢。英政府已證明唔會。當今世上邊個政府可以保護你唔俾美帝搞?唔知可以問長居深圳嘅張五常教授,冇錯就係中國政府。但中共本身都係Faust,你要有嘢換畀佢先保護你。滙豐有乜嘢換?現最能推翻中共政權,就係佢哋嘅金融系統出現97年印尼嗰隻危機,故習主席先要搞資本分配系統改革,而滙豐就可以喺呢個位成為有用之士,所以特區政府都話抱樂觀態度。八年前叫一注獨沽,今日滙豐已再冇信徒,我則叫一注獨贏。今日我亦會買我人生第一手滙豐,市場見!

孫柏文
獨立股評人
http://facebook.com/shuen
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載