› 選擇地區
三藩市
紐約
洛杉磯
其他美國地區
香港 台灣 北美
 
2015年04月28日

智取大市:
牛市三大換馬天條 - 晉佳

投資者喺牛三之中,心情特別忐忑,原因係明知呢種環境炒得一日得一日,冇可能長久,所以只要手上持倉喺大牛市點穴一日,就感到非常蝕桌。尤其近兩日,資金集中炒作央企重組概念股,其他二三線股只係微微向上,少啲定力可能都沽走好嘢、換入喺高位有調整風險嘅股票。喺冷靜同激情之間,各位要拿揑到中庸之道。
以晉佳經驗,即使遇上目前咁強嘅牛三環境,對於手上強勢股,點都要有番兩日耐性。換言之,一隻股喺連續兩日升市唔郁,第三日先至考慮換馬,而換馬對象一定要係股價升勢剛剛確立嘅股票,務求令整個倉位嘅上升空間、進攻力都有增無減,呢條就係換馬嘅第一天條。
第二條換馬天條,就係喺升市日當中,單日換馬嘅規模,唔超過整個持倉嘅20%,務求令持倉保持較高穩定性,以免喺市況波動之際打亂陣腳,高追低沽。單日換馬佔持倉比例因人而異,亦要因應各人size而定,呢個亦要閣下自己好好拿揑。
至於第三天條,就係每日做功課。每日收市後,都要望一望手上股票嘅圖表,然後細心諗吓下一日容許沽貨換馬嘅先後次序,務求將走勢最弱、最唔惜貨嘅股票沽出,將沽錯貨嘅可能性減到最低。
晉佳相信,只要做到呢三條,換馬嘅能力,起碼能夠提升50%。
講番大市,恒指剛剛強勢突破28000,第二浸升勢先至開始。不過,幾可肯定呢一轉升浪嘅速度,會冇4月咁快,原因係而家冇突如其來好消息出現,加上大戶已經唔需要好似之前搶包山咁搶貨,所以大市只會因應個別板塊有利好消息,先至逐格逐格推高大市,所謂逐格,可能係近期嘅每日200至400點。

阜豐走勢靚睇8元

咁樣仲好,畀夠時間二三線股輪流升,只要靚圖突破兼成交增加,追入相信冇乜閃失,強勢股當然係由佢放紙鳶。
噚日資金湧入央企重組概念股,但去到中石化(386)、中石油(857)都可以急升8%嘅時候,炒重組概念可能暫告一段落,晉佳依然覺得,二三線股都夠多選擇。
二三線股可以留意阜豐(546),呢隻全球味精行業霸主,同A股上市嘅梅花生物各分半邊天,但阜豐市盈率17倍左右,遠低過梅花生物嘅60倍。阜豐剛剛突破52周新高,走勢靚絕,8元應該冇走雞。
另外,上星期五晚唔少美國上市科網股升到爆廠,其中,亞馬遜今季首次將雲端業務表現獨立分拆一條數出嚟,證明雲端業務見得吓人,相關概念都有得炒吓。港股相關概念best choice可能係神州數碼(861),佢打算買入旗下神州數碼信息服務嘅新股,後者正正係專注自有軟件、服務、雲計算及大數據分析等業務,食應潮流,雲端業務仲要有主要股東聯想控股嘅龐大客戶群,想唔勁都難。
執筆時,神州數碼仲未公佈季績,如果條數靚仔,今日股價對辦,仍可追入,因為隨時炒番增長概念,首站上望16元。

晉佳
http://www.facebook.com/pages/ 晉佳/719009541518415
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載