› 選擇地區
三藩市
紐約
洛杉磯
其他美國地區
香港 台灣 北美
 
2015年05月12日

智取大市:百盛宇宙最殘有計 - 晉佳

早兩個星期跌得多嘅熱門股,噚日都大幅反彈,上番去上周調整前水平,但另一邊廂唔少當炒細價股散晒,究竟市底係好定唔好?
最值得關注,之前兩星期喺28000點樓上,已經feel到資金開始飽飽滯滯,係咪兩三日調整就足夠消滯呢?出現咗技術調整之後,係咪有因素刺激大市再破頂呢?減息?唔係啩,所以港股短線轉強因素,暫時未睇到。晉佳唔係睇淡,而係需要再觀察吓究竟調整完成咗未。
閣下可能會諗,如果上星期被震走,上星期五同噚日唔少個股急彈,唔追番貨容乜易被放甩?
大家要記住啱啱4月港股幾咁癲,如果升市重臨,個股升勢肯定唔係過去兩日每日反彈幾個巴仙咁小兒科,一定又有三幾個星期炒到癲,又有機會日日出糧,等到確認升市重臨再全力搏殺,總好過喺冇信心情況下焗住大手追貨,有乜風吹草動又要沽貨避險,左一巴右一巴兼可能打擊信心,咁就無謂。
總之淡定有錢剩,等有信心入市嘅時機先至全面進取。
要睇港股係咪短線轉強,不妨以H股指數小時圖保歷加通道去睇。H指喺4月17日升到去14942點見頂到而家,指數一直未試過突破小時圖保歷加通道上軸,呢個可以當係調整浪嘅反彈阻力,而家距離呢個阻力只有100點唔夠,唔爭在觀望多一陣。
假如H指真係突破14270點,初步確認調整完成,不妨可以勇進番啲,至於到時可以考慮百貨股。

中長線睇4元不難

銀泰(1833)剛剛喺上星期五表演大陽燭破頂,成交激增,噚日再升兩成,炒重組之下,可以喺個市升勢未確認之前發威,夠晒強勢,其他有重組概念嘅百貨股,自然亦要留意。百盛集團(3368)都有潛能可以激發,噚日升8%,出現大陽燭,係舊年8月20日以嚟最大單日成交,momentum番晒嚟。
內地百貨行業低迷,一嚟係因為行業供過於求,二嚟因為打貪之下人人買少咗貴嘢,三嚟因為電商搶生意,百盛股價一沉百踩,現價低過2007年最高位接近九成。對於一間正正經經做生意嘅公司嚟講,估值肯定勁低殘。
事實上,舊年有德銀計過,百盛手持物業嘅市值,已經每股值2.34元,仲未計佢手持淨現金0.4元人民幣,即係未計百貨業務正現金流,都每股值2.8元,而家當然係平到唔信。
百盛今年首季受到租金官司拖累而被罰款,會轉為虧損,但其後相信可以回復正數經營溢利。
長遠嚟講,就算唔私有化都大有重組嘅機會,或者係吸引到其他企業入股,肯定冇得再衰。如果突破埋月線圖保歷加通道中軸嘅2.16元,中長線上望4元都唔係難事。

晉佳
http://www.facebook.com/pages/ 晉佳/719009541518415
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載