› 選擇地區
三藩市
紐約
洛杉磯
其他美國地區
香港 台灣 北美
 
2015年05月12日

女神tea time:滿足你三個願望 - Fifi

結好水漲船高,自然更值錢。圖為集團主席洪漢文。 資料圖片

早幾日個市調整,《人民日報》係咁講「慢牛、慢牛」,跟手人行宣佈減息。種種迹象係阿爺未想個市炒完。有眼見股市大莊係阿爺,佢要做到慢牛的話,係一定會(要)做到。如此一來,最直接受惠係證券界。本地券商股俾內地券商係咁收購,買少見少,散戶買中嘅機會率又提高!
是日推介結好(064)!首先本地券商股可以賣嘅所餘無幾,結好係其中一間!好簡單供求理論,供應減少,價格自然高。結好水漲船高,自然更值錢。睇埋市賬率(PB),耀才PB高達5.4倍、英皇有2.7倍、新華滙富(188)有2.5倍,但結好PB得嗰0.6倍,連1倍都冇,你話係咪超值先!你可能會話,「抵還抵,但佢之前發盈警,我淆底。」不過你睇清楚通告,就知盈警係因為去年出售金都及若干相關資產,錄得一次性收益,基數大咗,就咁睇今年條數好似少咗。不過集團期內持續經營業務溢利有所增長,所以實情係假盈警、真盈喜!
結好除咗抵,基本因素好外,更重要係佢冇沽壓!事關大股東洪漢文供股後,得番29.99%股權。佢實在唔可以再沽,再沽佢就分分鐘冇埋個控股權。冇沽壓,仲要咁抵,要挾上真係話咁易。早前結好話考慮分拆集團證券業務上市,更加可以將證券業嘅光明前景反映喺股價上。以2倍PB計,結好起碼值1.6元啦!

Fifi
http://www.facebook.com/lovefrystock
本欄逢周二、四刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載