蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年05月12日

中環在線:邀靚女坐鎮慳宣傳費
新聞小花蔡雪瑩 加盟新鴻基金融 - 李華華

蔡雪瑩同周嘉儀都相繼過檔金融業。

港股進入大時代,基金、散戶積極參與之外,證券行亦招兵買馬大肆擴張,證券行想以最短時間打響名堂,除咗不時出奇招賣廣告之外,最快靚正可能就係請位有一定知名度嘅前新聞小花坐鎮,唔打得都睇得吖嘛。最新消息,前新聞小花蔡雪瑩(Snowy)今日加盟新鴻基金融。

周嘉儀過檔興證曝光多

要講呢期最紅嘅前新聞小花,肯定係最近轉去中資券商興證香港做市場拓展聯席董事嘅周嘉儀(Venus),齋睇Venus成日喺各大報章媒體上曝光,都已經幫興證慳咗唔少宣傳費。
新鴻基金融可能見到前新聞小花咁有宣傳效用,就睇中最近回復自由身嘅Snowy。Snowy今日就會去新鴻基金融返工,主要係喺私人銀行「新鴻基尊尚資本管理」做銷售工作。Snowy話,嚟緊會主力幫上市公司老闆管理財富,不過,最緊要都係考咗牌先講。
新鴻基金融𠵱家要發大嚟搞都合理嘅,除咗因為港股成交嘭嘭聲,今年初內地券商光大證券買入佢哋7成股份,當然要做嘢。而有咗光大證券呢個大股東,肯定又會帶來唔少內地大客嚟幫襯,當然要請定人手。
Snowy舊年10月離開大台,去咗四大會計師行之一安永做公關,雖然半年左右就離開,但點都應該有些少財經基本知識啩,轉去私人銀行邊學邊做,應該難唔到佢嘅,畢竟佢只係28歲,仲有大把時間學嘢喇。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載