› 選擇地區
三藩市
紐約
洛杉磯
其他美國地區
香港 台灣 北美
 
2015年05月19日

中環在線:羅康瑞拒與財爺比武
「整傷人就唔好!」 - 李華華

有人噚日問羅康瑞(右),有冇邀請過財爺比試身手,佢笑住話冇。

財經界原來有唔少武林高手,眾所周知嘅係財爺曾俊華,佢既懂劍擊又係洪拳高手,有「上海姑爺」之稱嘅羅康瑞亦係自小習詠春。有人噚日問羅康瑞,有冇邀請過財爺比試身手,佢笑住話冇,理由係「整傷人就唔好!」言下之意,即係財爺都唔係佢對手?

相關新聞:中環在線:兼顧公司公職要捱眼瞓

二人各跟名師習武

羅康瑞做咗一年機管局主席,做埋今個月底拜拜,下月就過去貿發局擔任主席。臨別秋波,佢噚日約埋傳媒茶敍傾偈,期間佢講起自己13歲開始學詠春,學到廿幾歲先停,近幾年都冇乜點樣練習,不過學到嘅招式已經成為佢身體嘅一部份,好似早排佢喺上海工作,有同事跟佢過兩招,佢本能反應使出一招推開對方,對方即刻俾佢推到老遠咁話。
既然咁厲害,咁有冇搵過財爺過番兩招先?羅康瑞就即刻耍手擰頭,話「整傷人就唔好」。嘩,唔知財爺知道上海姑爺咁講,會唔會即刻主動約番姑爺來一個武林大會呢?不過又咁講,財爺硬生生俾人掟中雞蛋,都係笑笑口話醫生叫佢唔好食咁多雞蛋,區區一句說話又點會激到佢吖。
翻查資料,羅康瑞與財爺都係跟大師傅習武。羅康瑞以前曾經提過,佢係葉問徒孫,3年前佢旗下瑞安房地產(272)喺詠春發源地佛山推售樓盤項目,羅康瑞就搞花臣,炮製咗條《詠春》紀錄片。至於財爺嘅師傅就係鄺鐵夫,而鄺鐵夫就係林祖(傳奇人物林世榮姪兒)門生。兩位嘅拳腳功夫肯定相當了得,不如記協明年周年晚宴邀請兩位做嘉賓,嚟個友誼賽喇,肯定高收視喎。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載