› 選擇地區
三藩市
紐約
洛杉磯
其他美國地區
香港 台灣 北美
 
2015年05月26日

女神tea time:等待新主的殼股 - Fifi

意科上年9月供股,但認購不足有三成由包銷商要番。 資料圖片

近來同經紀朋友食飯吹水,講開佢啲大陸客係點,一個字形容:狠!首先你要知,對於基本因素,佢哋真係唔會care,即係就算畢菲特企喺佢哋面前講價值投資法,佢哋係會當人發噏風;就算一隻冇業績嘅股,只要技術上有買入訊號,就算已升咗半成、一成,都會照衝。另外係,佢哋200%信消息多過信業績,等別係佢哋最鍾意喺微信朋友圈收風,所以你明點解內地散戶愛股,好似百麗(1880)、國美(493)一升就發晒癲。提外話,問到佢哋最鍾意問咩問題,朋友就話:有錢嘅,冇咩問題;中間嘅,問買咩好;窮嘅,問點解收費咁貴。
是日推介細細粒嘅意科(943)。公司上年9月供股,但認購不足有三成由包銷商要番,而原大股東完全冇供,持股少過1%。咁包銷正常唔會接手盤生意,當然要找人接殼。去到同月又極速配股,似係貨源歸邊後想加注。供股同配股作價分別0.5元同埋0.47元,上周收0.42元,幕後金主都未返家鄉,你使驚?再講今年2月以每股0.188元配股籌2,430萬,料都係圍畀新金主嘅自己友。問題係金主幾時蒲頭?公司市值2.97億元,啱啱好殼價,公司最近公佈以3億元收購肥料製造商,已變相易手。一連串財技後未炒過,貨源已歸邊,現價又安全,不妨買啲參與吓。

Fifi
http://www.facebook.com/lovefrystock
本欄逢周二、四刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載