› 選擇地區
三藩市
紐約
洛杉磯
其他美國地區
香港 台灣 北美
 
2015年05月26日

中環在線:「恒生新抱」何倍倩
鍾意被叫老闆 - 李華華

何倍倩細細個就已經接觸美容產品。 李潤芳攝

唔少人嫁入豪門之後,都按興趣搞生意、參與慈善活動。有「恒生新抱」之稱嘅何倍倩(Anina)一樣,佢10年前與恒生銀行(011)創辦人之一何善衡孫兒何乃斌結婚,婚後兩年創立護膚品牌Zensation,佢其中一個心願就係踢走「恒生新抱」呢個稱呼,希望將生意發揚光大,其他人都改稱佢做「Zensation老闆」。
Anina坦言,家人有叫佢做少奶奶咪好囉。不過佢一畢業,父母提供六位數資金畀佢創業,做護膚品代理,佢一直想繼續喺呢方面發展;加上婚後冇經濟負擔,令佢冇壓力咁做生意,就算要照顧3名子女,佢都唔想放棄事業。
而且,佢發覺有自己事業,跟丈夫有更多話題。佢透露,最近有私募基金有興趣入股佢間公司,佢唔熟悉財務,丈夫就畀到好多意見。不過,避免有爭拗,兩夫婦平時唔會干涉對方嘅工作,此乃夫妻相處之道咁話。

相關新聞:中環在線:兩歲細女都要護膚

搞護膚品 因媽咪啟發

至於點解做護膚品,Anina話係從媽媽身上獲啟發。佢媽媽做美容儀器代理生意,Anina兒時已跟媽媽周圍去睇廠、睇美容儀器,「自細已經知道一支唇膏點整出嚟」。因此,Anina起初創立自家護膚品,已有門路搵廠生產。
佢深明香港對本地護膚品牌嘅認受性唔高,於是先進軍美國市場,打響名堂先,希望香港市場更接受呢個品牌。
的確,相對其他歐美日韓護膚品牌,Zensation在港嘅知名度唔算高,Anina想將佢發揚光大,令到大家都記得佢係老闆娘,以後寫佢個名之前,唔一定叫「恒生新抱」,相信仍需要一段時間,加油吧!


李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載