› 選擇地區
三藩市
紐約
洛杉磯
其他美國地區
香港 台灣 北美
 
2015年06月17日

一周三件:G.A.叫緊兩飛 - 錢雋

G.A.控股今年頭一季盈利已等於上年全年盈利,有炒盈喜概念。 互聯網

G.A.控股(8126)今年頭一季盈利,已經等於上年全年盈利,嚟緊炒G.A.半年盈喜,再炒升格主板,超值租!
G.A.主打豪華車零部件、整車分銷,同售後服務,主要合作夥伴係寶馬。今年頭一季G.A.盈利一支箭增長咗5倍,上到5,728萬元。雖則盈利包括一項豁免應付利息4,563萬元,但G.A.頭一季主打瓣數收入,增加近30%,毛利率亦改善到39%(上年頭一季36%),主打瓣數亦好靚仔。再講,G.A.頭一季盈利已超過上年全年盈利5,044萬元,嚟緊半年成績單同全年成績單,掂檔!

市值細殼味濃

唔好計多,G.A.單係本業回復正增長,今年EPS增長33%,去番2013年0.158元,現價(1.03元)預測PE,跌到6.5倍。計埋上豁免應付利息呢項非經營收益,G.A.更加跌到得3倍幾PE!場內主打寶馬製銷嘅華晨(1114),今年預測7.9倍PE、有製銷寶馬發動機嘅新晨動力(1148)8.9倍PE,G.A.PE平咗截。又G.A.只1倍PB,上邊華晨講緊2.6倍,新晨動力亦講緊1.34倍,講PB,G.A.又係最平。
G.A.喺4月中公佈話轉主板,集團家陣市值得5億元,街貨市值更只得2億幾,已經夠晒殼味。講係咁講,若果真係俾人撩變身,G.A.升格主板,仲值租。
又G.A.主要股東包括獨立人士方振淳,方氏揸住G.A.的9,079萬股或19%。而同名同姓嘅投資者亦曾經同樣喺創業板嘅浙江世寶(1057,創業板舊冧巴8331)出現過。浙江世寶由2011年轉主板到家陣,累升咗270%,創晒上市新高。
咪扯咁遠,買G.A.單係炒今年盈喜,已經有得博。又只係用本業6.6倍PE作準,G.A.追番上新晨動力近9倍水位,已經要升近40%到1.42元。

錢雋
細價股專家
本欄逢周一、三、五刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載