› 選擇地區
三藩市
紐約
洛杉磯
其他美國地區
香港 台灣 北美
 
2015年06月18日

廣告經綸:可惜董伯伯唔搞波波池 - 文廸晞

即使董伯伯拍多幾條電視廣告,都唔及一個波波池的威力。 資料圖片

過去一星期,一個降落太古城的黃色波波池令全城着魔,大人細路蜂擁而至,勁至連網上黃牛飛都出現。點解一個只得一堆膠波的波波池,都可以令香港人咁狂熱?理由其實好簡單,香港人,實在太鬱悶。波波池的出現,能夠滿足香港人的心理需要。
香港人心底裏一直好恨有一個場地可以供大家發洩,消消悶氣,減減戾氣,見到連大人都可以玩埋一份的波波池,自然全城追捧。香港人悶是有原因,政改搞來搞去都與真普選無緣;以為政府發多幾個電視牌,香港終於可以步入維基時代,帶給大家多點快樂,結果又是走不出無記獨大的年代。
香港人一直渴望樓價可以回復至人類可負擔水平,點知又係唔食唔住,練仙都要等15.5年先買到蝸居樓。明明已經無限OT,為工作把生命燃燒殆盡,最終都係與上車無緣,生活質素嚴重營養不良,你話人生幾悲哀。所以,我有理由相信,香港人係有嚴重的心理鬱結,極其需要搵個地方發洩。一個適合大人玩的波波池,畀機會大家玩餐飽,清洗一下煩惱,對香港人來說好重要。
所以,我建議董伯伯的「團結香港基金」,既然擺明車馬要團結香港人,就不要大灑千萬元,大搞甚麼電視廣告,拍埋一個好outdated嘅廣告。今時今日仲翻唱羅文的《奮鬥》,一班人企埋一齊,叫香港人發憤向上,團結一致,迎難而上。呢類橋段,回歸後已經用足十幾年,recycle完又recycle,到了今日的後佔中年代,仍照辦煮碗繼續用,真係唔知幾多人會buy。
錢多,但都要用得其所。董伯伯不如搞多幾個波波池,辦多幾次Slide the City,加開幾場Colour Run,然後encore幾隻黃鴨遇着多啦A夢的盛事,令香港每個星期都好熱鬧,香港人每個周末都好happy。即使董伯伯拍多幾條電視廣告,都唔及一個波波池的威力。舊式思維,配合舊式橋段,企圖用這一套征服一班港式毛孩,效果會有幾好,唔使我講啦,講完。

文廸晞
mailto:heyadmen@gmail.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載