› 選擇地區
三藩市
紐約
洛杉磯
其他美國地區
香港 台灣 北美
 
2015年06月22日

笑到最後:輪到股玩你 - 高明

上周五,港股升過最多300點嘅時候,高明輸到坐喺度,除咗三隻玩開股:港交所(388)、平保(2318)、騰訊(700),今個月被佢玩之外,上兩個禮拜推介嘅美聯(1200)都一路陰吓陰吓咁陰到嘔。到個市接近倒跌時,當然係輸到瞓喺度啦!
4至5月難得出現「你玩股」情況,今個月終於輪到「股玩你」,「27000點樓下撈貨黨」最後縮沙,原來係明智決定。講返美聯,特別係禮拜五A股瘋狂下跌,以A股升幅,其實係套現,套現啲錢去邊?中國人喎!有錢梗係去炒起人哋啲樓市,香港首當其衝,買一手樓,佣金美聯賺得最多,始終都會係A股散水受惠股。
不過,美聯自推介日開市3.94蚊開心咗一日,星期五收市報3.51蚊,跌幅超過一成,追貼A股上周跌幅,老實講,真係好難捱。
唯一可喜係地產股長實(1113)同埋新地(016)收市有人掃高,前者可能係李嘉誠自己掃,後者假設係市場跟掃,即係市場都相信一手樓市銷售潮未完,美聯應該要耐心等盈喜,如果未捱到變化石的話……。
今個月發生咗兩件事,令到「中央」神化型象不再。第一件係中國足協海報事件,明明想懶幽默,想網上騙讚(呃like),結果手法笨拙,反而加強香港本土意識,失敗!第二件事係政改離場,事先講到幾精密部署,點樣操控發言時間,掌握幾時投票,結果離場攞烏龍,竟然得8票支持,否決已預計,但肉酸冇面係大罪,失敗!

一旦手痕買長實

兩件事寓意係:中央吹水能力一流,政策設計可能係二流,執行嗰班人就九流。即使你話足協、獻世派、中聯辦、港澳辦等等,都係九品芝麻官,中央高層都係英明神武,現實問題係,要執行,唔會係習總,一定係芝麻官執行。
可能一路一帶、央企改革、減息降準係好偉大決定,但執行嘅人就係獻世派水平,粗疏、甩漏、唔重視過程同細節。中國改革注定會失敗,敗喺細節,本欄同意友人王弼所言,A股牛市可能得番5個月貨仔,暫時唔買中資股,一旦手痕,寧願跟誠哥買長實。
最後,如果A股真係爆煲,相信香港另一個泡沫──建制派泡沫,由2003年見底後急速反彈,到前日離場事件觸發股災,大陸顧唔掂自己,邊有咁多閒錢養廢人,恐怕建制派會同A股一齊爆煲。

高明
https://www.facebook.com/bigricetea
本欄逢周一刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載