› 選擇地區
三藩市
紐約
洛杉磯
其他美國地區
香港 台灣 北美
 
2015年06月23日

金手指:點解要賣香港樓 - 孫柏文

在佔中事件,香港爭取真普選人士嘅意願毋庸置疑。 資料圖片

對上一周香港政制及政局好多新聞,呢度係投資版,故我唔講啱或錯。今日純粹分析,特別係下一步會有乜發生同本地資產價格會點。首先大家要記得我話過喺今年初賣咗樓,亦解釋過係因覺得香港唔係無機會出現大規模種族衝突甚至屠殺。上周之事,亦只係確認我分析。

和平爭取證明無效

約兩年前香港有批聲音話之前幾十年嘅和平、合法爭取普選嘅方法唔得,故就發明一樣叫做佔中嘅概念。佔中最核心就係和平,不過非法。當時有好多想爭取真普選嘅人,都覺得佔中特別係非法嗰部份太激,搞唔搞到都成疑。點知佔中或承繼嘅雨傘運動,不但做咗仲要超乎預期咁多人支持,香港爭取真普選人士嘅意願毋庸置疑。點知投入大量嘅精神、心願完全無效果,最終政制方案同八三一好似無雨傘運動咁。
西貢搵到炸彈,唔知堅定流,亦唔知邊個做。深黃即刻指住話係false flag,即有如啲人傳當年花旗國炭疽菌係由中情局放,等國民支持打伊拉克。但呢個趨勢你會覺得怪嗎?而雨傘運動最大嘅得着,根據Karl Popper嘅否定論,就係和平、合法唔work,和平、非法都被結果否定效果。
上周五喺獅子山學會晚宴,我發表呢個預測時,有人問:「香港人唔鍾意暴力喎!例如我。」我答話,暴力一定會有人試,因所有和平爭取方法已被證明無效。仲要唔係打爛立法會玻璃嗰隻。第一步我相信將會以唔傷人、冇經濟價值開始。我問番佢,若有人趁夜深人靜,炸爆咗灣仔會展對出嘅金紫荊雕塑,拍埋短片上facebook會有幾多個like?佢笑住話唔止like,仲會share。
香港之後,好嘅就學台灣,唔好嘅就北愛爾蘭。到時會係大家未出世嘅下一代,打佢哋未出世嘅一代。若你覺得通過吓啲廿三條就無事,咁你嘅水平亦係信可「等埋發叔」。故若你喺香港有多個物業,係時候做業主界嘅湯家驊,減低香港比重離場。

孫柏文
獨立股評人
http://facebook.com/shuen
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載