› 選擇地區
三藩市
紐約
洛杉磯
其他美國地區
香港 台灣 北美
 
2015年06月23日

魚樂無窮:憑大股東手影搵靚殼 - 唐牛

皇朝傢俬市值9億,市賬率0.64倍。圖為集團主席謝錦鵬。  資料圖片

面對自己嘅心頭好,每個人都會盡力爭取︰大人會爭演唱會飛、爭手袋、爭真普選,細路仔亦會爭玩具、爭零食。股票市場一樣,有好股梗係搶埋一份,但如果唔係一般老散,而係上市公司大股東呢?
皇朝傢俬(1198)上月宣佈,以先舊後新方式配售2.78億股,每股作價0.24元,涉資6,700萬銀,完成後大股東兼主席謝錦鵬持股量由32.1%降至26.8%。不足一個月,謝錦鵬提出自願有條件部份現金收購,以每股0.43元,向合資格股東收購2.2億股,涉資近億元,完成後謝錦鵬持股量將由26.8%,大幅增加至39.9%,較第一次配售前還要多。
由被攤薄至變相增持,究竟謝錦鵬爭取甚麼呢?顯而易見,就係超過三成嘅控股地位,點解咁重要?其實有唔少蛛絲馬迹︰皇朝傢俬主要喺內地產銷中高檔傢具產品,近年業績走樣,兩年共蝕6億,意興闌珊是常識吧。公司市值9億,市賬率0.64倍,集齊業績差、細細粒、資產厚因素,賣殼未嘗唔係好選擇。
上述係咪謝錦鵬奪回控權嘅原因?畀多個貼士你,謝錦鵬宣佈局部收購當日,集團將位於麼地道嘅總辦事處出售,涉資7,000萬銀,卻未有售後租回安排,總部都唔要,意味啲乜?自己想想吧。從投資角度出發,0.43元乃底線,上望幾多?一幅超美麗圖畫,可以係無價寶。

唐牛
https://www.facebook.com/tongcow88

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載