› 選擇地區
三藩市
紐約
洛杉磯
其他美國地區
香港 台灣 北美
 
2015年06月24日

一周三件:重慶機電值博 - 錢雋

重慶機電食住國策一帶一路,發展前景亮麗。 互聯網

重慶機電(2722)單係食住重慶市本身,就一帶一路嘅投資,嚟緊嘅日子有數圍,兼有得博盈喜。又國企改革密鑼緊鼓,重慶機電亦遲早要落實注資,但市值仲係好細奀,有得諗。

半年業績隨時盈喜

重慶機電基地重慶市,係一帶一路重要支點,據祖國報載,喺今年嘅重慶國際投資暨全球採購會,中外商簽署咗80個重點項目,總投資額3,233億元人仔。又就住一帶一路單係重慶市所佈局嘅重大基建項目,額度講緊1.2萬億元人仔,又以市內打造包括汽車同高端產業,目標2020年時,總產業規模上到2.2萬億元人仔。重慶機電機單係食住重慶市未來投資發展,嚟緊日子已經有運行。
重慶機電啱啱今年4月,宣佈出售重慶美的通用35%,套現1.77億元人仔,估計獲利1.28億元人仔。呢壇製作獲益,已等於重慶機電上年上半年總盈利1.9億元人仔嘅67%,連埋本身主打瓣數溢利貢獻,重慶機電嚟緊半年成績單,有得博盈喜,今年PE有機會落番單位數。市場亦估計重慶機電出售通用美的主要目的,係放低合資包袱為集團日後喺製冷機產品更加海闊天空而鋪路,已經有重組味道。
重慶機電管理層上年亦提過,阿媽重慶機電集團會向重機注優質資產。重慶機電H股市值20億元唔夠,就算計晒所有權益,總市值都係講緊65億元,比起阿媽上600億港銀資產,簡直小兒科,重機正係等緊快高長大,迎接注資。
重慶機電現價(1.77元)0.9倍PB,場內近磅行家上海電氣(2727)2倍PB、祖國行家華中數控(深300161)7.4倍,瀋陽機床(深000410)更加高達8.5倍,重慶機電平咗一大截!煲重慶機電,博現水位再翻半番到2.7元計數,1.35倍PB,仲未追到最近磅嘅上電。

錢 雋
細價股專家
本欄逢周一、三、五刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載