› 選擇地區
三藩市
紐約
洛杉磯
其他美國地區
香港 台灣 北美
 
2015年06月24日

魚樂無窮:三大富豪坐鎮概念股 - 唐牛

職場上有一句順口溜︰識人好過識字。 資料圖片

職場上有一句順口溜︰識人好過識字。簡單而言,任你讀幾多書、資質幾高都好,如果人事關係唔好,不得民心,隨時做死一世小職員。相反,假若人脈夠強,廣結朋友,三兩下手勢就可以做到揸fit人,跳槽更加係易如反掌。做生意一樣,產品服務平靚正,但泊唔到大碼頭,可以執笠收場。如果有全港最有錢嗰班人幫襯你呢?大膽講句︰想窮都難!
今日推介嘅怡邦行(599),正正屬於想窮都難份子,公司主要從事批發及零售建築五金、衞浴、廚房設備及傢俬,主打香港市場,內地及澳門亦有涉足。最新業績顯示,佔比近八成嘅批發業務,收益按年升26%,至4.4億,主要受惠本港物業發展項目樓量上升。睇真啲,期內合作樓盤包括緻藍天、柏傲山、The Parkside及天鑄等,意味長實地產(1113)、新地(016)及新世界(017)都係佢嘅客,有三大富豪幫襯,生意肯定長做長有;另一方面,澳門生意亦勁升兩倍,當地發展重點將由賭場轉移至娛樂渡假村,怡邦行又係啖啖肥肉擺落口。事實上,公司歷史悠久,成立接近40年,難怪盡得龍頭地產商歡心,去年度盈利爆升6.3倍,市盈率9倍唔夠,保持連續十年派息紀錄,息率達5.3厘,最新市值僅5.6億,連細價股鑊氣都有埋。咁多優點集一身,噚日一舉創上市新高,相信只係大升浪嘅前奏。

唐牛
https://www.facebook.com/tongcow88

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載