› 選擇地區
三藩市
紐約
洛杉磯
其他美國地區
香港 台灣 北美
 
2015年06月24日

中環在線:港大畢業唔選港姐
蕭若元千金加入投行 - 李華華

蕭瑤瑤話出於好奇所以撐爸爸場,點知成為傳媒焦點。 黃珮琳攝

易還財務(8079)主席蕭若元噚日畀咗個驚喜大家,就係首次正式介紹佢位愛女蕭瑤瑤。剛大學畢業嘅蕭瑤瑤一露面,即刻搶盡爸爸風頭,仲不停被人問佢會唔會考慮參選港姐。若果佢參選,肯定可以跟近日人氣嘅「十優狀元港姐」麥明詩好好較量。

蕭瑤瑤想做恐龍專家

蕭瑤瑤芳齡21歲,剛畢業於港大政治哲學系,談吐舉止都得大方得體。佢從小就讀國際學校,讀寫英文比中文好,所以說話時間唔中都中英文夾雜。
佢見爸爸噚日搞記者會,好奇走去撐場,蕭若元亦唔介意大家認識佢呢位可人兒。
被問到會唔會加入易還財務,瑤瑤就笑笑口話,「我會出去累積工作經驗先,well……我已經有offer,8月會去投行工作,由於唔係formal offer,所以都仲未知道係咩position」。
有人問瑤瑤會唔會選港姐,佢首先係露出腼腆神情,之後就甜笑咁問「點解個個都咁問我㗎?我唔會啦!人哋讀書咁叻……」企喺旁邊嘅蕭若元見狀,即刻慈父上身,掃一掃寶貝女嘅一把秀髮,加多句話「佢唔會(選港姐)嘅」。
其實,瑤瑤7歲時已經上過電視台節目,當時佢話想去美國研究恐龍,想做考古學家,又點會志在選港姐呢?
驟眼望落去,瑤瑤有啲似前學聯秘書長周澄,蕭若元咁鍾意論政,瑤瑤平日應該汲收唔少,佢唔選港姐,唔做恐龍專家,將來可以考慮去從政,肯定好多粉絲,話唔定成為一黨之首㖭呀。
講番轉頭,蕭若元其實有4個仔女,大家都識搞電影嘅蕭定一,仲有比較低調嘅蕭定欣,至於瑤瑤仲有個妹妹蕭雙雙。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載