› 選擇地區
三藩市
紐約
洛杉磯
其他美國地區
香港 台灣 北美
 
2015年06月29日

一周三件:中信值得煲重 - 錢雋

常振明任主席的中信股份,改組後估值低,值博率高。 資料圖片

有輪商報道話,部份個股窩輪,出現俾街客收到歸晒邊嘅情況,係近年少有,當中一隻對應正股,就係中信股份(267)。唔講乜concept,中信食正金融熱爆潮,預測PE跌到得5倍,比恒指綜合平均平咗半,已經有值得煲重理由!

估值超平追落後

中信上年改組兼獲阿媽注入勁厚金融資產,喺5.9萬億元總資產當中,呢瓣係佔咗過八成比重,達到5萬億元。而喺金融海嘯期打後,大出血嘅資源能源瓣數,縮到只係佔重組後總資產嘅2.5%,影響係微乎其微。諗到係,食住阿爺力谷金融,製造財富效應,嚟緊日子,中信金融瓣數,照計係最賺到錢,兼掂過碌蔗!場內專業評估,亦係咁估,中信今、明、後三年EPS係2.15元、2.3元同2.54元,增長34%、7%同10.5%,PE由8.8倍,跌到得2015年6.5倍、2016年6倍同2017年時5.5倍。
仲吸引係,憑住大比例金融瓣數,場內預估中信NAV,由去年底17蚊,升到去2017年時近24蚊,增幅達到41%,2017年預估PB,得番0.5倍!場內無論銀行、證券或者保險瓣數,都無好似中信咁平嘅PB!又中信現價(14蚊)喺2008年金融海嘯期後、近六年橫行底,比起上年阿媽注資時,引資社保基金、國壽(2628),同今年引入泰國首富謝國民、日本五大商社之一嘅伊藤忠等等大孖沙嘅每股成本價13.48到13.80元,高出幾個巴仙咁大把,大孖沙點會志在區區幾個巴仙回報?
恒指由今年到後年PE預測係11.1、11.6同10.7倍,三年PB預測係1.38、1.3同1.2倍,中信PE平咗半,PB更加平60%!買中信單係追恒指10.7倍PE水位,係講緊要升95%,到27.3元,追恒指1.2倍PB,係要升106%,到近29蚊。

錢雋
細價股專家
本欄逢周一、三、五刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載