› 選擇地區
三藩市
紐約
洛杉磯
其他美國地區
香港 台灣 北美
 
2015年06月30日

智取大市:過埋七一 劫後重生 - 晉佳

大陸星期六嚟一下雙降,煲到咁行,擺到明想阻止A股急跌,但噚日A股朝早升唔起,就證明中央出招都冇用,迎來更大恐慌,呢一點晉佳喺周日嘅facebook page預先交代了。
噚日滬綜指一開市就倒跌,撤退可以話係當時唯一做法,點知逃生窗只係開咗5分鐘都唔夠,中午收市前,仲要連細價股都殺到一頸血。噚日跌得又快又急,喺開市頭幾分鐘唔夠決心沽貨的話,就避唔過噚日呢一劫。恐慌情緒加劇,要大市拗腰回升,第一,係要有突如其來好消息出現,晉佳估計已經唔係乜嘢深港通所能挽救,而係人行正式推出QE,有一個咁勁消息嘅話,大市V形反彈先嚟追都唔遲,使乜同你諗乜嘢位撈貨?
第二,要大市出現嚴重超賣或重大技術支持位,而家恒指日線圖9 RSI係29,至於滬綜指就係24.2,未夠低,仍有條件繼續洗多一兩日倉。事實上,噚日H股指數最低觸及4月突破嘅今年首季阻力位12400點,然後反彈,H指周線圖9 RSI亦跌至接近2013年6月錢荒至今嘅上升通道支持線,所以噚日中午落一轉地獄,原來係巧遇首個支持位,然後即市跌幅收窄。
不過,星期三係七一假期,內地A股照常營業,今日投資者心情好難平復,大家都驚A股連插兩日,港股星期四返到嚟隨時落夠三十六層地獄,所以揸cash嘅話,都係等星期四放完假返嚟再睇,可能短期內有撈貨機會。

有危自會有機

如果睇長線,晉佳亦唔相信牛市已經完結。由2011年歐債危機至今,恒指一直呈大漲小回趨勢,以周線圖觀察,恒指上升軌處於23800點左右,跌破呢個位,先算係2011年至今港股牛市結束。即使恒指跌破25000點嘅話,只要周線圖仍保持一浪高於一浪,相信今年底、明年初,恒指仲有機會殺上31000點,換言之,晉佳中線仍比較樂觀,有危先有機,永遠都冇錯。
短短一個第二季,對於投資者嚟講,可以話係一個唔錯嘅測驗,首先喺4月測試吓各位如何喺升市之中賺到盡,5月如何喺波動市之中揀強股,喺6月如何趨吉避凶,單單一季就考驗各位嘅進攻、防守能力,總結嘅就係第二季回報表現。
姑勿論第二季表現如何,大家不妨趁半年結,好好檢討第二季嘅得失對錯,好好改善自己攻守能力,然後打好下半場,皆因股市跌完之後,睇嚟仍會有新一輪升浪,所以保持正能量最重要。

晉佳
http://www.facebook.com/pages/ 晉佳/719009541518415
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載