› 選擇地區
三藩市
紐約
洛杉磯
其他美國地區
香港 台灣 北美
 
2015年07月07日

金手指:不問價追摩比 - 孫柏文

胡翔任主席的摩比發展,昨收報1.59元,跌7%。 資料圖片

對上幾個交易日嘅市況,相信唔使同大家重溫。亦唔到我呢啲青春派、走偶像路線嘅財經演員講跌市。但若問我有何睇法,第一件事就係估唔到759店周末六折劈價周年慶後,到股市都劈價。第二,我想勸本報同事,唔好叫大陸發生緊嘅市況做「官鱷大戰」。大媽被斬倉或止蝕相信就算係盲嘅,都唔會覺得見到鱷魚。若大陸嘅沽壓,係來自加埋冇一千人嘅「大鱷團」,你估李克強逐個見面照肺唔會扭轉跌勢咩?

接斬倉貨最開心

有老外兼國內分析員,話人行作為央行一齊落場踢,直接托市,會破壞誠信。乜誠信先?印鈔買股會破壞啲人對人民幣購買力嘅信心?係。但呢啲係長遠問題,如果唔係,作為白銀戰隊隊長嘅我,都唔使睇低迷嘅銀價睇到心罨。今次最破壞誠信唔係中共落場踢,而係中共落場踢都輸。中共大大聲話要做到啲政策結果,唔係一定做到嘅咩?共產黨唔係全能嘅咩?而家喺國內,就有最識嘢(有錢應該識嘢啲)嘅一億人,從呢次股市睇到呢個國王原來冇着衫!呢個中共講完原來係做唔到!托市咁簡單都做唔妥,咁啲乜一帶一路、亞投行呀,可以食蕉啦?呢個「中共全能形象」泡沫爆破先係最不明朗。
對上幾個交易日我一路都輕力加注,到噚日我就「暴力」入咗摩比發展(947)。你一睇可能問:「暴力入同不問價追有乜分別?」其實噚日沽盤掛牌好稀疏,冇得掃,幾萬銀就掃上廿個價位。啲貨係掟落來,即係賣嘅人冇耐性。咁冇耐性應該係被迫賣,即係斬頭盤。眾人皆醒你獨醉好out,喺呢個信貸氾濫嘅世界,應該係眾人皆被斬倉你獨真金白銀接貨先最開心。要知點解我睇好摩比,google孫柏文、摩比,睇番我以前寫過好多嘅文就得。至於我買咗幾多?差不多我成份老婆本,所以有冇錢娶老婆就睇佢。其餘嘅老婆本?周二應該多啲沽盤掃,所以會用埋去不問價追摩比!

孫柏文
獨立股評人
http://facebook.com/shuen
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載