› 選擇地區
三藩市
紐約
洛杉磯
其他美國地區
香港 台灣 北美
 
2015年07月07日

智取大市:
暴力救市兩日見真章 - 晉佳

近期有唔少讀者喺4月入市揸重港股,遇正近期大跌市中途,繼續揸又唔係,沽出去止蝕又唔係,去到呢種進退兩難嘅情況,操作永遠係最困難。
晉佳認為,最有效嘅應付兩難局面嘅做法,其實係預先避免進入兩難困局嘅漩渦。下一步,就的起心肝每一日做好功課,諗定下一日嘅操盤策略,例如升市要點做,跌市要點做,個倉跑輸大市又點做,想贏多啲又要點做,所有策略必須超前預想,先至能夠第一時間做出適當行動。
例如,喺人行減息兼降準後嘅上星期一,開市前諗定劇本,眼見好消息配合之下,港股都升唔起,必須減持。定好策略,行動就會變得機動性,如果可以喺上星期一大手減持,就能避過跟住一個星期嘅地獄跌市。
今次跌市既成事實,未來就要好好諗一諗,港股會唔會好快見底?如果見底又要點執倉?進行任何投資,要成功必須要勤力,共勉之。
面對七國咁亂嘅市況,要好好分析大市形勢,首先係要搵出重點,其他non-event嘅嘢就唔好嘥時間分析,希臘脫唔脫歐?晉佳只會睇睇標題就算。
今日重點係,點解中央出咁多招,港股噚日都插得咁勁?A股又咁弱雞?中央連環出手救市,但同時又要為孖展去槓桿,避免日後A股出現高槓桿風險。救市最有效嘅方法,係先唧走配資,取而代之係用實錢彌補缺口,成為股市資金新動力。

第一注買華夏滬深300

中央噚日靠救市消息令A股裂口高開,然後繼續斬孖展,似乎係等孖展斬夠,風險減低,先由實錢入場掃貨。
中央打開口牌支持A股,噚日都唔能夠撐起股市,係咪代表中央救市失敗呢?晉佳偏向相信,中央幕後智囊多的是,打得出疑似亂章的牌局,其實背後可能係一場有紋有路嘅翻身戰。只不過中央想先為A股去瘀,然後先打針。至於幾時去完瘀?應該就快搞掂,以免救市消息攤凍,再唔升就冇人信中央,股民失信心就更不堪設想。
點解中央救市措施咁暴力?唔怕嚇壞外資?原因係中央要先安撫A股大戶,而呢班A股大戶本來炒股就係暴力哥上身,中央要應付呢班大爺,就要以暴易暴,外資睇法唔理得咁多。
晉佳從來唔同意A股係一個散戶主宰嘅市場,只係A股大戶個性生得比較似散戶咁解,而喺肯聽黨中央說話先有運行的潛規則之下,中央要各部委以至券商齊聲支持股市,其餘大戶就可能鬥入市以示效忠,然後隨住食物鏈向下伸延,最後連散戶都動用儲蓄不停掃貨,只要乖乖地用實錢炒股,就係愛黨象徵。
然而,中央呢輪救市係龍係蛇,應該未來兩日就自有分曉。家陣中央打莊,晉佳相信,只要大市短期能夠回穩,就可以博呢一轉順風車,到時第一注,先買華夏滬深300(3188)。

晉佳
http://www.facebook.com/pages/ 晉佳/719009541518415
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載